來源: 忽然一週, 第382期
張衛健型到吔蕉
「型到跌渣」究竟點解? 相信無乜人知道真正答案。
據張衛健透露，此乃北京大學生新興的圍內術語，純粹得意過癮，無乜得解，總之很型很酷便是了。最近的張衛健，的確很型。跌唔跌渣無從考究，但冷帽下那份悠然自得的自信，不單止型，還應該是很紅很紅的見證。光頭或黐毛的張衛健 + 自創式無厘頭對白，已是近年電視史上一個必殺技，足以令他在一個水平線上平穩地前行，不再突然升高，不再無聲滑落，不再大屋搬細屋，不再發霉發錢寒。
「係，我真係好怕再好似以前咁起起跌跌，我而家最想係平平靜靜咁嘆下紅的滋味，行出街等人望下、羨慕下…… 但可惜，呢幾年頻頻撲撲，忙到冇時間enjoy 自己紅。」
張健一天趕三場，做完宣傳做訪問，做完訪問再趕去看許志安演唱會，「型到跌渣」無得解，「型到吔蕉」都無得解。但紅，原來真係有得解 。
最愛張茜單純
每隔幾年，張衛健便會回來一次。為新劇做應做的宣傳，不外是再重頭一次訴說自八四年獲新秀冠軍後十八年來的多次大起大跌，問的、答的，都有點老生常談。唯一令張衛健眉飛色舞的，是女友張茜，本是累極了，忽然又變得龍精虎猛，型到跌渣！
張茜與張衛健母親相處融洽，令她在健仔心中加了不少分數。
「其實每個人需要，都不外乎係一個愛人、一間屋、有衫、有飯開！」 對張衛健而言，追尋一個愛人，與衣食住行，同樣重要，所以入行以來的三段戀情，江欣燕、宣萱、張茜，他都敢愛敢認。 「可能我份人坦白，乜都講清楚，所以分手之後大家重係好朋友。依家當我心情好又無乜做時，都會打畀江欣燕同宣萱問候兩句，唔知係佢大方定我厚面皮呢？哈！哈！」 一陣笑聲過後，張衛健開始一本正經地教你如何與已分手的女友繼續保持好朋友關係。 「其實都係講好普通話題，例如，對欣欣咪講，喂，你老公錫唔錫你呀？生唔生仔呀究竟你？對宣萱咪講，聽聞你同男朋友分手喎，真定假呀？純粹好單純式問題，完全冇任何機心。以前拍拖就有機心，我問候佢，唔多唔少想自己加分，令對方更加愛我。但依家就出於真心去關心一個老朋友。」現在已拍拖四年的女友張茜，張健自言最愛她單純，一向在大陸生活的她，不像香港女仔般虛榮、有機心。
張衛健與江欣燕的戀情維持了四年，女方現已嫁得如意郎君。
「我唔係話欣欣同宣萱虛榮，只係大家相遇時間唔啱，我俾唔到幸福佢地。我記得我第一個女朋友係圈外人，我係酒廊唱歌時識，佢粗魯，又食煙又講粗口，但唔知點解我都鍾意佢兩年。我心底其實渴望搵一個乖、斯文女仔，所以一遇到江欣燕就好快拍拖。我好懷念當時日子，大家出社會做事，互相扶持，好真好純，正一係兩顆赤子之心。」張衛健愉快地回憶往事，即使四年後江欣燕嫌他沒有事業基礎而分手，他也無怨無悔。 「鬼叫自己當年霉咩！之後雖然拍《老友鬼鬼》彈起過一排，但好快又滑落番。跟住同宣萱一齊，係我最霉日子，睇住佢一日一日上位，而我就冇得撈，點忍心叫佢同我一齊捱！後尾決定去台灣發展，我就同自己講，第日紅賺到錢，一定要返娶佢……」
與宣萱一起的三年，張衛健自言是自己最霉的日子，從來沒給過對方幸福。
與宣萱的婚結不成，反而造就了張衛健回大陸拍戲，從而結識了張茜。 「阿茜同我一樣，都係一好簡單直接的人，同佢一齊好舒服，唔使猜度對方。呢個社會做事已經好多猜疑，今日呢個朋友對你好，可能轉個頭就鬧到你仆街，如果返到屋企見到你愛人重要估估下，咁真係好辛苦。」
阿媽大過天
張衛健最痛錫母親，如將來老婆與母親合不來，他寧可再揀過。
不過，要成功成為張衛健的女朋友，一定要過張伯母那一關，因為，他自小父母離異，母親含辛茹苦地帶大張衛健三兄弟，自然是母親大過天。
「你話我自私又好，乜都好，假如將來我老婆同我阿媽相處唔到，我寧願搵過另一個。其實，老人家有幾難服侍？不外乎係希望你返屋企食餐飯，揸車小心，況且我阿媽係一個好開通好yeah的人，一個禮拜游三次水，跳三次健康舞，又鍾意打電腦game、麻雀機。講得難聽，老人家重有幾耐時間？阿媽冇得揀，但老婆就有。「我呢一生人，最感激係我媽媽，因為佢從來都冇放棄過我地。我爸爸係行船，我中二那年離開我地，佢走當日，阿媽一直喊，十足十粵語長片咁。阿媽就問我地三兄弟跟邊個，我地齊齊答，當然係跟老母。」 張衛健徐徐呼出煙圈，心情出奇地平復，如今自己事業有成，父親的離去，已沒有甚麼大不了。
難得的全家福，張衛健（右一）珍而重之，可惜此情不再。
「阿媽當年只係三十零歲，佢絕對有權唔理我地走去改嫁，但佢冇，反而好堅強咁養起頭家，周圍搵BB湊。當時湊一個B都有幾百蚊一個月，全盛時期我屋企有成六、七個B，我放學返就幫手換片、開奶。好煩，我餵佢食野又會走來搶，一日到黑嘈喧巴閉。」張衛健輕輕地笑道，幸好，少年不識愁滋味。「好在，我同阿茜拍拖四年，佢同我阿媽相處好好，佢好尊敬老人家，我去杭州拍《齊天大聖孫悟空》時，阿茜得閒會陪佢行街飲茶。但都係我唔好，掛住做冇乜時間陪女朋友，不過我好識得製造浪漫，間唔中送小禮物俾佢，例如，我成日失驚無神出現北京探佢，我咪係最好禮物！哈！哈！」
明星係全家捧出
張衛健很早便出身了，當過酒廊歌手，做過office boy，及後拿了個新秀冠軍，以為從此便在娛樂圈平步青雲，但原來只是投閒置散地浮沉。 「 新秀之後幾年係我最down的時期，電視台放棄我，唱片買得二千張，試過成年冇野做。老豆原本留間屋俾我地，係美孚，但都係唔掂，後尾賣，愈搬愈細，最後搬到沙田住村屋。但我好慶幸，屋企人從來都冇埋怨我，阿媽從來冇叫我唔好做呢一行。「我最記得當年拍《龍兄鼠弟》時，有一次唔知醒遲大到，畀萬梓良媽叉到飛起，佢好語重深長咁同我講：『健仔，一個明星誕生，係靠全屋人捧佢出來，你既然唔知醒，可唔可以校多幾個鬧鐘，又或者叫屋企人叫你？你到底明唔明？』我當時真係唔明，心諗，萬子你鬧我咪鬧，做乜要拖埋我屋企人落水？後尾我終於明白，原來我有今時今日成就，真係靠屋企人不辭勞苦咁捧我出。」 張衛健在九一年拍罷《老友鬼鬼》後，成功紅了一陣子，家人便從沙田村屋又搬回了美孚，但可惜只是曇花一現，事業再度滑落，又從美孚搬了去元朗。一家人隨他事業的起跌遷徙，張健其實很過意不去。「咁多年，我屋企人已經慣，我紅時就住大屋，滑落時就搬細屋，但佢從來冇吭半句。」
依家，我阿媽係我個鬧鐘，我好懶，佢就負責無論如何都要叫醒我開工。我第二個細佬Henry ，就係我形象指導兼助手，我所有衫褲鞋襪，佢都幫我搞掂晒。至於我最細細佬張偉基，佢係做警察談判專家，專叫人唔好跳樓。佢份人保守到死，係我個投資顧問，幾時買樓，幾時賣樓，張AE咭條數簽得勁得滯，佢都會提醒我，佢最興同我講：『喂，張衛健，你再係咁簽落去，下半年實食谷種喇……』」
今天的張衛健，已毋須再過顛沛流離的生活，出入代步的，是價值八十多萬的法拉利跑車，身價是二十萬一集電視劇，與家人住在上水二千多呎複式洋房，方便養狗。間屋大嗎？他狡黠地笑笑：「OK大啦！」曾經憑《西遊記》、《韋小寶》、《方世玉》攀上高峰，但亦曾由高處跌下無人問津，他最怕的，是這樣起起跌跌。追求平穩，已是他最大渴求。
「我覺得以我咁天份，係唔應該有今日咁成績。講唱歌，我冇張學友、許志安唱得咁好。講跳舞，我又冇郭富城咁掂。講靚仔，我又冇劉德華、謝霆鋒咁靚仔。做戲？我係得，但論外形，我又冇劉青雲咁有性格，冇梁朝偉咁cool，更加冇周星馳頭腦……可能我一直有呢種自卑諗法，反而可以激勵到自己。你係咪甘於做一個明星仔先，係咪冇所謂，但我唔係，我希望做一個star，咁既然自己天生冇人條件咁好，就努力度多抵死對白。觀眾睇你張衛健就係要你呢過癮之嘛。大笨象會跳舞，馬騮仔會上樹……」
弊，你等我一陣！
「我入行十八年，代表作都有三、四部，方世玉、韋小寶、孫悟空，排名不分先後呀，你叫我即刻埋單結數，拎張成績表出來睇，都真係唔輸蝕！依家環顧兩岸三地，要搵男主角拍電視劇，我諗我都肯定佔一席位啦！」 張衛健說，十八年學會的，是在當紅時不可驕傲，不可寸，因為你不知那天會不再紅。但今天，張健確實是有點寸。《齊天大聖孫悟空》平均三十五點收視，意料中事，自然是寸得起。
「喂，你唔好行埋黎住，我放個屁呀！嘻嘻！」坐在木箱被數百隻香蕉壓住的張衛健俏皮地說，隨後拿起數隻滋味地吃起來。「弊，你等我一陣，我想篤屎先……！」過了十分鐘，張衛健「如釋重負」地回到影樓。「舒服晒，頭先講到邊呀？」其實，張衛健，不寸的時候居多。
《少年英雄方世玉》
《齊天大聖孫悟空》
《小寶與康熙》
張衛健最喜愛的三個角色，方世玉、韋小寶、孫悟空，令他非常自豪。
撰文：林蕾
攝影：梁幹持
協力：黃家邦
化妝：小白（A&V Make Up School）
沒有留言:
發佈留言