【雜誌】朝花夕拾 - 吳國敬

日期: 2015年3月12日
來源: 壹週刊第1305期，豪語錄

朝花夕拾 - 吳國敬 (節錄)

魚販 - 「喂呢條新鮮靚喎，朋友見得我多便首先揀走。」

我引開話題：「後來轉換唱片公司更不順利，於是把發表慾寄託在寫歌給朋友唱？」
吳國敬說：「很早知自己紅歌唔紅人，我可以攞『最佳中文流行歌曲』卻不入選十大金曲。別想得太複雜，我就是為了餬口，亦冇諗過將好嘢留俾自己，反正冇碟出。最霉時，中一首歌（指被採用）收六千蚊夠交租，中兩首夠開飯，中三首就焗麵食時可以加多孖臘腸。
「我甚至沒想過為朋友度身訂做，啲歌多數由熟人唱，只因我像個魚販，喂呢條新鮮靚喎，朋友見得我多便首先揀走。張衞健成日幫我口，拉許志安和鄭秀文來， Sammi挑了《我們的主題曲》，於是我有了第一首作曲的金曲。

「好講運氣嘅。《愈吻愈傷心》起初冇人要，我唔服氣，趁成班朋友在何超儀家時播出來，鴉雀無聲，蘇永康說他要好了，捱義氣嗰種。結果呢？代表作呀，這行業邊有得解。」

理論上，作比唱更具技術含量，但吳國敬說，成名歌星自有公司安排大計，作曲家呢，靈感不到便生活成問題。他試過一口氣寫出一百首，又試過停產幾年。

環視人家的錄音室，吳國敬說：「 Mark Lui叻在穩定， keep住有 hit歌，我衰唔穩定。」

新秀 gathering愈來愈似家長聚會，拖男帶女了。

我說過要你快樂

開作品音樂會遇上兩難式，一方面技癢最好全部親身演繹，一方面唱他作品的粒粒巨星，嘉賓陣容比主角更吸引票房。吳國敬喜孜孜告訴我， Big Four兄弟必撐場，阿嫂 Sammi也來，還有 Kelly……「我唱一半便好。」

他甚至自己知自己事，將主持人身份推給張衞健。「 Dicky是我小學同學，他知我開 show便笑：『你講嘢呀？』係喎，由他幫我搞氣氛仲好。我二哥口吃，我也一緊張就條脷打結，怕講錯嘢，得失朋友。」