【雜誌】一個人的煙火 - 吳國敬

日期: 2015年3月13日
來源: 忽然1周第1024期，單人訪

一個人的煙火 - 吳國敬 (節錄)

吳國敬第一張唱片名為《玩火》，亦是他的成名曲；隨後，他有一首歌叫《噴火》；好兄弟梁漢文說他是「樂壇霹靂火」。

好火，當然有跡可尋。

去年，吳國敬作了一首《世紀老八巫》寸爆甄妮；又係去年，他向記者爆蘇永康與女友結婚，搞到阿公嬲咗佢一晚；一○年，因為泊車及搬屋問題，他向鄰居持刀恐嚇，觀其外知其內，「都是火爆的。我說話不經大腦、直腸直肚，有時會過了火位，得罪人。」

觀其友知其人，吳國敬最好的兄弟是「 Big Four」，但在他們當中，他經常成為被取笑的對象，「張衞健說我：『呢條友成日都十吓十吓！醒少少得唔得呀？』」

很想將相片變成吳國敬噴火，略嫌太過造假。
其實煙跟火，從來相隨。

============================================================

「我說話直腸直肚，但有時會過了火位，人家便覺得我『唔襟撈』。我自己都覺得，要學習收斂。不過我喜歡自己直，真的！但有時衝動起來，會『困親』人，直還直，我也不可以令到人不舒服。」

要改變一直以來嘴巴比腦袋快的習慣，並非一時三刻的事，特別在最好的朋友前，戒心放下，踩屎機會大大提高。

「對着 Big Four，有時說話說得太快，我以為當笑話說出來，原來不好笑，他們聽完之後：『喂！唔係笑話囉，你窒緊我喎。』我撞過很多次板。

四十九歲的吳國敬下月在紅館舉行入行三十周年的首個作品展，好兄弟「 Big Four」當然是鐵腳嘉賓。

「例如剛剛張衞健生日， Big Four有個訊息群組，個個都 send『生日快樂，恭喜恭喜。五十大壽要大搞喎，點搞先？』我便懶抵死地說：『係啦，搞啦，你估咁易過到五十㗎！』我知道他不會生氣，但之後有朋友跟我說：『喂！咁講嘢㗎你？人哋正日生日，你咁講嘢好唔吉利！』我話：『我諗住講笑㗎咋……』佢話：『唔好笑囉！唔好笑呀你知唔知呀！』然後我說對不起。其實我怎會想傷害人？我只想搞笑，誰不知自己的搞笑能力經常撞板。正等如你正日生日，我哭喪着臉，當然不好啦；就如你去殯儀館唱生日歌。我想講笑，但環境、氣氛不適合嘛！所以我叫『撞板蟲』，經常瀨嘢！現在學會講之前，先想一想，不好笑就不說。」

好朋友沒隔夜仇，在 Big Four中，吳國敬亦經常成為他們四子的取笑對象。

「我就是戇居居囉，阿 Dick（張衞健）話我：『醒少少得唔得呀？』其實兩睇，他們喜歡我『十』，沒有甚麼機心，傻仔勁一個，但有時就吃虧一點。

「有時一些撞板事、烏龍事會激死他們。我經常提供笑話，蘇永康結婚時，我上錯記者車已經夠好笑啦，這個可以笑十年！我就是這樣的角色。」