【報紙】Big Four 同Mark嫂慶祝生日

日期: 2016年7月21日
來源: 蘋果日報

Big Four 同Mark嫂慶祝生日

雷頌德(Mark)同老婆Jade(梁家玉)都係喺7月生日，咁阿Mark出名錫老婆，佢就特登喺老婆生日正日，約晒一班老友記開P，包括許志安同老婆鄭秀文(Sammi)、梁漢文、張衞健、蘇永康、吳國敬、歐陽德勛同老婆蔡立兒等。今日有周刊報道，就話一向不勝酒力嘅梁漢文，生日P到飲大兩杯，離開時見到記者就衝上前，撲向記者，嚇到許志安同Sammi即刻跑上去拉住佢。

一班老友喺火炭一棟工業大廈租場開p。

吳國敬就有張當日慶祝嘅相上載到微博。

據報道講，上星期四(14日)，Mark嫂正日生日，兩公婆唔知係咪想同老友玩得盡興啲，就老遠咁約咗佢哋去火炭一棟工業大廈開生日會，貪呢度冇時間限制之餘，仲唔驚有陌生人騷擾嘛！當日張衞健仲揸住佢架價值400萬嘅法拉利到場之餘，仲叫司機車咗一大袋禮物送俾一對壽星，人到禮到，果然係老友！

主人家Jade都係ig到多謝咁多人同佢慶祝生日。

梁漢文酒後失儀  安仔Sammi醒目拉佢走

當晚佢哋玩到零晨2點，蘇永康就同老婆、歐陽德勛夫婦先行離開。直至3點半，安仔等人都先後離開，而Sammi就飲到面紅紅，腳部有啲浮，但都好開心咁同記者話送咗個手袋俾壽星女。之後吳國敬就同梁漢文出來，梁漢文就飲得好high，見到記者就衝向記者，仲用手拍打鏡頭，大叫：「Hello」，真係有啲失禮，安仔走上前拉住佢，Sammi就好醒目咁，同同老公合力拉咗梁漢文上車，等佢唔好再失儀。