【報紙】B3各自離港度歲

日期: 2017年1月22日
來源: 蘋果日報

B3各自離港度歲

許志安今日喺九龍灣舉行新碟《18安士》簽唱會，吸引大批粉絲同途人圍觀，佢又同粉絲玩遊戲及獻唱，fans送上自製嘅賀年banner，有哂佢、鄭秀文同埋新碟合作嘅樂隊卡通頭像，好有心思。

許志安今日喺九龍灣舉行新碟《18安士》簽唱會。

好快就農曆新年，安仔話農曆新年會留喺香港：「年年都唔喺香港過，今年想陪下屋企人，我屋企又人多呢，都係不停咁食食食，唯有跑多啲步囉。」

至於好友梁漢文、蘇永康及張衛健都離港度歲，笑謂剩低佢自己過年，計劃等Sammi完成埋手頭工作，3、4月放長假，考慮去歐洲旅行。咁準備好利是未先？安仔話年年都差唔多：「包利是好好玩，隔離屋個細路女會過黎幫手。」

咁安仔不如快啲自己生個BB一家三口包利是啦？佢就話：「咁到時又唔好玩㗎啦，屋企有時都講呢個話題，越催越咩呀，你明啦，我好醒即刻轉話題囉，總之順其自然啦。」

安仔仲話期待下身邊朋友啲BB先，好似蘇永康嗰個咁：「睇下生出嚟啱唔啱戴眼鏡，我送個眼鏡畀佢。」