【報紙】張衛健專一娶張茜 贏盡全城祝福1

日期: 2009年1月13日
來源: 太陽報

張衛健專一娶張茜 贏盡全城祝福！

恭喜！恭喜！張衛健（Dicky）同張茜終於開花結果，尋日在菲律賓聖奧古斯汀教堂舉行婚禮，呢個教堂特別之處係世界文化遺產之一，寓意佢地的婚姻都係非常之難能可貴。睇見張茜的「白髮」新娘Look，亦代表佢有信心同Dicky白頭到老！

形象健康好男人

其實前年Dicky同張茜已經在內地註冊結婚，舊年張茜不幸流產，Dicky為咗哄番老婆仔開心，唔單止搵埋好多親友一齊開解同加以照顧，仲向張茜再次求婚，然後就籌備呢個菲律賓浪漫溫馨婚禮，為張茜彌補心靈上的創傷，同時亦希望留低一個美好回憶。難得Dicky雖然係大忙人，但無時無刻不忘對愛侶關懷備至，費盡心思，唔止老婆仔張茜，連所有朋友都大為感動。咁美滿的一段婚姻，大家都希望同相信佢地好快再報喜。

健仔一向形象專一，乃絕種好男人，佢同張茜拉埋天窗，當然係贏盡艷羨目光啦！

對女友重情重義

睇返Dicky，出道以來唔單止工作勤力，重情重義，入行廿幾年，自N年前同宣萱分手之後，隔了幾年先同張茜拍拖，講緋聞直情係零。一直勤力搵錢的佢，事業有成就買千萬豪宅送畀張茜。而且佢對傳媒亦非常合作，冇亂搞新聞博見報，就連張茜不幸小產，佢都有晒交代，絕對係一個非常合作之人。

講到婚禮安排亦非常妥當，出錢包晒賓客同埋200幾位中、港記者食宿機票，仲派出細佬親自招呼，由籌備到拍婚紗照到婚禮，一切都大大方方，同各位分享喜悅，今次結婚，自然得到全城祝福。