來源: 都市日報
Big Four 延續歡樂
蘇永康、梁漢文（Edmond）、許志安及張衞健（Dicky）在09年以兄弟幫姿態成立Big Four， 四位一體後即號召力驚人，翌年在紅館開辦多場演唱會一概座無虛席。
其實Big Four 的成功不無原因， 正如他們所說：「觀眾睇Big Four演唱會其實最想得到兩樣東西，就係要聽金曲，同埋要開心，要令觀眾開心， 首先自己要開心。所以我們每次上到台都係真心玩，真心笑！」大概就是這種真性情，令Big Four四子成功深得觀眾的寵愛。
============================================================
撰文：Emily Tsui
攝影：豪
場地：紅磡都會海逸酒店
髮型：Billy Choi（許志安）、MOE@MM ILCOLPO（蘇永康、梁漢文） 化妝：Ling Chan （蘇永康、梁漢文）、Maggie Lee（張衞健）、江中平（許志安）
============================================================
上「山頂」派利是
Big Four鐵定於明年2月農曆新年舉行演唱會，今次是他們首次在農曆年開個唱，鬼馬的四人笑說：「其實我們開演唱會目的就係逗利是，唱唔唱歌都無所謂啦！」Dicky忽然打趣提議四子穿上魚網絲襪逗利是，安仔搞笑地回應：「咁我着魚網泳褲！」Dicky聞言即說：「咁不如着魚網絲襪加泳褲，畀觀眾攝錢入來，但千祈唔好攝硬幣，會頂住，哈哈！」問到安仔是否夠膽着，他即豪氣地說：「你夠膽攝，我就夠膽着！」
安仔還表示為怕觀眾沒有利是封在身，建議在紅館的所有座位底下都附上利是封，更笑言：「大家無理由見到個利是封都唔肯入少少落去啩？」除了出盡法寶逗利是，四子還有意破天荒在紅館派利是，實行「有入有出」 。他們更揚言要派到上「山頂」，爭取和所有觀眾近距離接觸。康仔說：「平時多數只可以同貴價飛觀眾接觸，點解平價飛唔可以？今次就想研究一下可以點配合，點樣可以派利是派到最遠，咁就大家都開心啦！」
齊齊練大隻
為了令演唱會更有「睇頭」，Big Four各成員都絞盡腦汁，希望突破自己，滿足觀眾們的視覺享受。Dicky表示四人正在努力練大隻，笑稱要做到「逼爆利工民」。據悉他們到時會「角色大執位」，如安仔就自爆正密謀苦練琵琶，而Dicky則自誇到時會大跳鋼管舞，若練不到才轉換其他表演節目。
至於服裝構思方面，一向愛衫如命的康仔就說：「仲未落實， 因為我想睇埋1月個時裝騷先再決定。」Dicky 即寸嘴反問康仔：「睇時裝騷？你去邊度睇啊？」康仔尷尬地回答：「我在網上睇。」Dicky聽後還抵死地寸多兩句：「哦，網上睇！ 你唔好畀佢呃到，好似好型咁，原來淨係網上睇！」看着二人「你一句我一句」地搞笑互寸，實在令人笑不攏嘴。
談到他們希望邀請誰做演唱會嘉賓，Dicky再次發揮搞笑本色：「睇下票房點啦，好就唔使請，唔好就成場演唱會都係嘉賓直落。」Edmond 則表示若到時《江南Style》熱潮未冷卻，會請港版《江南Style》MV的導演錢國偉上台和觀眾熱舞一番。
醉爆泰國團
距離演唱會尚有數月，早前眾人趁着空檔攜眷到泰國旅行，順道為今次演唱會度橋。不過，四人笑言這數天的旅程是玩多於一切，直情是「毫無收穫，吃喝玩樂」。安仔還大爆他們本想度橋，最後卻醉倒收場。「那時泰國的天氣好差，又打風又落雨，所以我們就困在房中諗住度吓橋，之後大家都諗唔到就搵酒飲，點知一路飲一路諗起好多往事 ，愈講愈多好開心，最後四個都醉晒。」Edmond笑指：「所以咩idea都無傾到就返香港。」
雖然度橋不成，但他們都很享受這次把酒談心的時刻，因為這些時刻往往才是最真摯，最值得珍惜的。猶記得安仔曾被傳媒拍到穿上白色三角泳褲激凸現身沙灘，汲取了上次的教訓後，他今次泰國之行已改穿黑色泳褲，並笑說：「白色那條已丟了，今次着黑色穩陣好多，就算有長鏡頭影過來都無事。」眾人還表示有意將在泰國旅遊所偷拍的短片播出，與觀眾分享他們的絕密私生活。
真摯兄弟情
在現今的樂壇，不管是新人還是舊人，都置身於銷量每況愈下的唱片市場中，當個人成績再難有突破時，集眾人力量的演出似乎已經成為另種一生存之道。Big Four 成立雖然只是短短3 年，但憑藉四人的人氣和實力，每逢開演唱會例必賣個滿堂紅。擁有如此驕人的號召力，Big Four 四子都感到十分安慰。Edmond說：「好慶幸可以在3 年內，建立到一個令觀眾有信心的品牌。見到好多人都話，『Big Four好睇啊，買飛啦』，呢樣係我們四個最開心的事。」
四人一向意見多多， 未知在意見有分歧時曾否發生衝突？康仔即說：「如果咁容易有衝突就唔會搞到咁多次演唱會啦！一定要做得開心先可以繼續做落去。」安仔就表示：「真係好少意見不合， 反而大部分時間都好快有共識。」不過他就承機抱怨Dicky經常不肯排舞：「佢恃住自己扮過馬騮，擒高擒低好靈活，成日齋睇唔練，但佢又真係記得晒所有舞步喎！」 雖然他們四個人經常鬼打鬼，但就是這樣毫無保留的表態，才是觀眾喜愛他們的地方。
沒有留言:
發佈留言