【報紙】Big Four掛住玩忘訪問

* 編按:
係架喇! 四個走埋一齊就係咁架喇! 完美演繹何謂「痴痴呆呆坐埋一枱」!

日期: 2012年11月28日
來源: 晴報

Big Four掛住玩忘訪問

Big Four演唱會又嚟啦！明年蛇年，Big Four攞到個好檔期開Show。喺演唱會個記者會度，佢哋四個不停接受各大傳媒輪訪，其中到無綫收費台做訪問，今次派咗位超級巨聲駱胤鳴做記者。

呢位妹妹個樣有啲似細粒版王菀之，佢一開聲好嬌、好鬼怕羞，佢自我介紹，話係第一次訪問佢哋。「大四」見人得得意意，突然玩意大發，當呢位妹妹一開聲講嘢，佢哋就一人一句岔開話題，搞到已經心驚膽震嘅駱胤鳴笑到講唔到嘢。

最後都係安仔識做，話「唔好再玩，做番訪問先。」點知駱胤鳴又彈咗句：「你哋唔好對我有興趣！」嘩！佢講完呢句，蘇永康即刻笑到瞓咗喺地，其他三個都笑到傻咗，竟然完全搭唔到嘴，連四周啲人都爆笑。

當蘇永康笑飽，起番身對住妹妹話：「啱嘅，做主持要夠膽識先得。」無錯，對住「大四」真係無晒符，少啲膽識都會畀佢哋嘅善意兼抵死玩謝。