【報紙】蘇永康《愈寫愈開心》專欄

日期: 1999年11月1日
來源: 蘇永康《愈寫愈開心》專欄

“老死”蘇永康眼中的「不死野草」張衛健

呢排張衛健紅到發紫，再一次證明佢拍劇好過唱歌！有睇過我同安仔演唱會都會發現，佢依家唱《足球小將》同13年前一模一樣，毫無進步，就知佢的天分係在演戲方面。

由92年到今日的《方世玉》，睇到Dicky的另一份毅力。佢係山邊生長的一棵野草，在任何環境下都生存到。 95年佢去台灣娛樂界發展，好快就紅，不過做過一輪唔係好愉快，就返回大陸拍劇。初頭佢話好辛苦，但唔使幾耐就適應環境，猛話北京有好多好野食，有好多野玩。其實只要有空氣、水同陽光，張衛健都會活得龍精虎猛。

草好易踩低，但踩唔死！睇佢由TVB出身，每次起完就跌，跌完又起，其實唔係佢唔想Keep住個勢，但硬係有好事多磨。好彩佢生命力特強，所以成班朋友之中，最唔使擔心佢。

自從窮過之後，Dicky好識得分配佢的財產，97年佢搵到米，就買車買樓，跟住返回大陸成年繼續搵銀。時值金融風暴，佢每次打電話落黎就聽到樓價股市大跌的消息，嚇到佢有一排唔敢搵我，費事心煩。

Dicky (張衛健洋名) 最令我敬佩，唔係佢經常在演藝界創出奇，而係佢確實好顧家！

88年我開始對得多，先知道佢因為自己讀得書少，好想兩個細佬讀多點書，所以壓力好大。有次佢要「死」五萬蚊出黎交學費，逼住去做秘撈。那時佢係華星第一個做秘撈的人，全靠佢帶頭，我至敢出去搵食。而Dicky為了籌多些錢，竟然每晚走上深圳登台。有陣佢日頭拍完劇，就即刻去九龍塘搭火車過關去深圳，唱完之後等幾粒鐘，第二朝一開關就搭頭班火車落黎，然後番無線開工，每日如是！有次佢同我講：「我真係頂唔順?！我尋日在九龍塘火車站喊，覺得唔知為乜，賺到了錢又唔係我的，又咁辛苦……」但講完第二日又上過去。

對我來講，佢的行為簡直系匪夷所思！因為自己冇家庭負擔，好難想像佢有幾大壓力，只係覺得佢咁做法點頂？但我記得有陣佢同我出來飲茶，依然經常講笑搞氣氛，表​​面上完全冇唔開心，唔想身邊的朋友同屋企人擔心。

而Dicky同阿媽的感情亦都羨煞旁人，佢兩母子完全冇代溝，我們去卡拉OK劈酒，伯母都會來劈埋一份，同我們玩埋一堆。 Dicky去大陸拍劇，無論點忙都會特登抽時間返香港同阿媽食餐飯，而且次數都幾頻密。 Dicky咁孝順，點到你唔敬佩！

張衛健話張茜令佢噴血、宣萱令佢出血，冇錯！ Dicky（張之洋名）每次拍拖都係一發不可收拾，成個人都訓曬落去個隻！佢對每個女朋友都忠心不二，就算有好正靚女仔撩佢都唔會動心，呢樣真好難得，細佬都甘拜下風。

Dicky係第三屆《新秀》冠軍，我就參加第四屆。我在排練時，身為前輩的佢成日來教路，識冇幾耐就已經叫我們出街玩。我開頭唔明佢點解咁熱心，但後來發現，因為我們班人之中，有一個女仔叫江欣燕！那時欣欣（江之暱稱）得18歲，好細個，所以佢媽咪唔係好想佢咁早拍拖。而我咁就住在欣欣隔籬，有​​人就借我過橋追女仔！每次去完街之後，Dicky都會送我們返屋企，但係要我坐車頭，佢同欣欣就坐後面。欣欣媽咪殺落來的時候，見到我都度個心都定了。

至於宣萱，我唔熟佢，淨系知道95年Dicky同佢分手時，Dicky傷得好重好重！我未見過張茜，但佢一定有過人之處。因為我以為Dicky經過重傷後，唔再敢拍拖。估唔到佢又訓「曬」落去，又話結婚又話生仔。雖然佢平時把口咁衰，但用情絕對專一，而且非常顧家，做佢老婆一定穩陣到癲！