來源: 忽然一周第607期，留言集
最後任務 - 江欣燕 (節錄)
以下是十條關於江欣燕的是非題：
1. 參加第四屆《新秀》入行，與李克勤杜德偉同屆。
2. 曾拍梅艷芳音樂特輯
3. 初戀情人張衛健為她跳樓
4. 曾離家出走
5. 扮過吳君如
6. 與關詠荷互寸鬧不和
7. 夜蒲時醉酒鬧事
8. 將全裸拍纖體廣告
9. 養鬼仔及小產
10. 正與老公辦分居手續
答案，頭五題全是「堅料」，後五題純粹老作。
你答中幾多，是不是有些題目睇落似層層？
觀眾總愛把久休復出的女藝人扣上帽子，通常離不開婚姻失敗、獨力養家之類。即是說：「一定有唔妥。」 是是非非，有時不一定跟江湖規矩。與其一定要為江欣燕復出找個答案，不如說無藝人新不如舊。
近半年，劇集飛的是米雪岳華林文龍郭可盈黎耀祥謝天華，大家都知道，有過去的人，才好看。 當今花旦拍一個鏡頭補一次粉，江欣燕勝在戚眉歪嘴也不怕脂粉剝落。她在十幾年前，早已放下身段。 「最開心係，仲有人記得我同賞識我。」雖未至於眼淚連連，但也字字感慨。
養尊處優七年，麻雀打夠股票炒夠酒也喝夠，差點跌落萬劫不復之地。清醒過來，慶幸仍未有新人可以接軌。
「再做多一陣先，遲D再諗生仔。」最後任務，是跟這個問題娛樂圈賭一鋪 … …
沒有計算
江欣燕說，其實很多人都對她誤解了。有雜誌暗示她「養鬼仔」，個個以為她古靈精怪；見她行街買名牌，又覺得她貪慕虛榮。 「養乜鬼仔，養鬼佬好過……個樣似壞人，未必真係殺過人。」她苦笑。 「其實我係一個幾開朗人，人地對我D評價，唔會太上心。我未必樣樣叻，但你將工作交到我手，一定全力以赴。」
事實上她從不欺場，當年做《歡樂今宵》，監製只叫她戴假髮扮菲傭，她索性把臉塗黑。 「其實無諗過上唔上位，當時只係想報仇，因為盧海鵬成日爆肚引我笑，有次忍到咬親條脷 ，我一心只係想整蠱番佢。」
江欣燕從來不是一個計算的人。她自小家教極嚴，中學讀聖士提反女子中學，參加校內合唱團與管弦樂團，中四前未試過單獨出街。中五參加新秀，只是聽聞偶像梅艷芳會當評判。她本來唱《似水流年》，但十六歲女怎滄桑得起？黎小田讓她改唱陳百強與林珊珊的《再見 Puppy Love 》。
「如果真係想入行，一早練好歌啦！」 入圍後，父母嚇得要死，試過從排舞室捉她回家。與張衛健拍拖，更是天地不容。 「張衛健其實好純品，但我當時只係十六歲，爹媽咪一定反對，死仔想『開罐頭』呀！哈……
「有次佢上我屋企睇相，真係睇相簿咋，個花王報寸，阿爸即刻返黎， Dicky嚇到要跳樓走！」江欣燕當時住汀九獨立屋，張衛健從二樓跳下，像拍戲般打個觔斗，然後搭小巴逃去。
與張衛健的初戀，現在說起依然很sweet。 「我地分手無涉及欺騙，當然可以做番朋友。」
說起往事，江欣燕笑得人仰馬翻。「阿爸打我一巴，我學人離家出走，杜德偉借間吉屋俾我瞓一晚。最慘係無帶銀包，要問朋友借一百蚊。」
故事教訓，離家出走最緊要帶銀包。故事結局當然是大團圓，一家人扭哭作一團。不過之後江欣燕返《歡樂今宵》，十一時十五分收工，家人堅持十二時鎖門。 「可能就係細個太乖，大個之後蒲番夠。不過依家唔得啦，朝朝五、六點起身，夜晚十二點，似個農夫！」
沒有留言:
發佈留言