【報紙】蘇永康屈許志安送禮

日期: 2011年9月15日
來源: 都市日報

蘇永康屈許志安送禮

相信生日禮物冇人唔想要，不過要開口「屈」，又好似唔太好，但係若然對方係好兄弟，又真係冇乜所謂。快將生日的蘇永康，早前與張衛健和許志安Shopping，竟然開口叫安仔送一件價值2萬蚊的皮褸給他做禮物，不過佢精安仔都唔笨，即刻將「責任」推向他人，激到奸計未能得逞的蘇永康紮紮跳。

本月24日是蘇永康的牛一，昨日他接受新城電台訪問時表示：「今年提早喺農曆生日食齋，和媽媽、女友一同慶祝，女友的外婆亦遠道從加拿大回港，逗留至11月，屆時會順道睇我嘅演唱會。」被問到長輩可有向二人催婚？康仔即說：「無人夠膽催婚，暫時未有呢個壓力，做埋個騷先講，女友又唔急，我結婚一定會公佈。」

康仔被問到可有收到朋友送生日禮物？他表示：「有日同Dicky（張衛健）、老鼠（許志安）去shopping，本來我想屈老鼠買件2萬幾蚊的外套畀我，話晒之前幫佢做咗3場個唱及summer pop嘉賓，但係蛋撻都無一個，於是我同安仔講話我生日想要呢件外套，點知佢就叫我搵Dicky送，Dicky竟然又畀錢，搞到我好嬲。」