【報紙】四兄弟錄歌搞大龍鳳

日期: 2009年12月9日
來源: 蘋果日報

四兄弟錄歌搞大龍鳳  口臭安仔咒梁炳離婚

許志安丶梁漢文丶蘇永康同張衞健四兄弟話一齊開演唱會，講咗好耐，終於落實3月12至14日開三場，佢哋做咗首主打合唱歌，歌名同佢哋自訂嘅組合名一樣叫《BIG 4》。

馮仁昭早幾日去咗睇佢哋幾個大細路錄音，歌係好聽，但佢哋合作時經常你寸我，我寸你，嘈交咁滯，連監製雷頌德都忍唔住問佢哋平時係咪咁相處，咁嘈落去，都唔知演唱會可唔可以順利完成呀。

健仔賣油唔賣肉

安仔見馮仁昭有咁嘅疑慮就話：「我哋感情不嬲唔好，係外界以為好好啫，無論工作家庭方面都不時有拗撬，唔認同對方，我哋其實唔係咁熟，貪圖一個利字，先會一齊開騷。」一聽安仔咁講，馮仁昭即刻醒覺，幾條友喺度玩嘢。

講番正經，康仔話佢哋開騷呢場大龍鳳，係想50幾歲60歲時回望從前，有番啲難忘回憶。

講到服裝舞蹈，康仔話：「服裝會由得過十大傑出衣著嘅許志安先生負責，佢冇嘢賣，多數都話用六嚿腹肌，我就唔擔心，擔心張衞健配唔配合到啫。」健仔即話：「我賣歌唔賣肉，聽我唱歌已經聽出耳油，我只賣油。跳舞方面呢，我哋係會排嘅，但到時跳唔跳就另一件事喇，大家都知我哋善變o架啦。」

問安仔到時會唔會俾個驚喜大家，宣布結婚，點知佢好口臭咁話：「梁漢文宣布離婚羅，其實近期啲演唱會興有主題，我哋都會以講笑為主。」梁漢文聽見都廢事睬佢，睇熟歌詞唱多兩句實際啲喎。