【網絡】十套亞視經典外購劇集

日期: 2016年3月3日
來源: Take it e時  https://eweekly.hk

【亞視回憶03】 十套亞視經典外購劇集 (節錄)

雖然今時今日，香港正吹「韓流」，但過去香港吹嘅「東瀛風」甚至「台風」，亞視都有份幫手鼓吹，事關當年亞視其實花唔少錢喺外購劇集上面，有啲甚至幫積弱嘅亞視打敗無綫㖭！

還珠格格（大陸）　播映年份：1999年

當年嘅紫薇、小燕子、爾康、永琪、皇阿瑪、容嬤嬤呢啲熟悉嘅角色，全部嚟自呢套大陸劇集，劇中嘅趙薇、林心如、范冰冰、蘇友朋等主角因而成名。呢套劇令一向只有個位數字收視嘅亞視急升至史無前例嘅20幾點，令無綫同時段嘅節目收視慘跌，甚至要變陣迎戰，結果都無補於事，亞視難得一次贏無綫呀！

當年我哋可能曾經坐定定追睇《還珠格格》大結局。

順風婦產科（韓國）　播映年份：2002年

當年亞視都有份帶動香港「韓流」，而且都幾成功㗎，就好似呢套韓國肥皂劇《順風婦產科》，每集半個鐘，輕輕鬆鬆笑一餐，當年出道無耐嘅宋慧喬都有份演出㗎！你又有冇睇過呢？

劇中一家姓「朴」，但當年可能好多人未必識讀「朴」呢個字。

阿信的故事（日本）　播映年份：1994年

八十年代知名日劇，以史詩形式講述日本女子阿信，由7歲到84歲為生存而掙扎、奮鬥、創業嘅故事。可能《阿信的故事》令你留下最多嘅，唔係歷史回憶，而係一絲絲好沉重嘅淚水。諗返起，呢套劇集真係好sad。

雖然無綫早喺1984年首播，不過大多數人都係睇亞視版本居多。

大儒俠史艷文（台灣）　播映年份：2000年

出產自台灣嘅布袋戲，圍繞主角史艷文帶領中原群俠對抗反派藏鏡人。經典之處除咗全劇為布袋戲之外，仲有搞鬼嘅配音，例如主角史艷文會叫做「史Sir」或「文哥仔」、另一大佬級人馬「教父」，又會叫做「God花打」。無論英文、市井廣東話、無厘頭對白定係時事生活都會玩一餐，非常過癮！

好多人曾經喺網上留言，話好想睇返亞視版嘅《大儒俠史艷文》。

少年英雄方世玉（大陸）　播映年份：1999年

雖然坊間有好多關於「方世玉」嘅劇集同電影，但呢套由張衛健主演嘅方世玉，應該喺觀眾腦海裡留下不少深刻印象。張衛健喎，齊天大聖喎。而呢套劇集同《還珠格格》一樣，為亞視贏得超過雙位數嘅收視，絕對係經典！

當年光頭嘅張衛健，憑住走俏皮路線，成功吸引唔少女粉絲。

流星花園（台灣）　播映年份：2002年

作為台灣青春偶像劇嘅鼻祖，來頭肯定唔惹少，淨係睇佢哋紅遍中、港、台就知幾咁厲害。當年有線播完，亞視即刻搶先一步購買播映版權，之後不斷loop不斷重播，結果咪順住個勢，成為經典之一囉。

當年言承旭、周渝民、朱孝天、吳建豪都係因為《流星花園》爆紅而組成F4。