來源: Yahoo! 娛樂LOL
《大帥哥》下星期首播 重溫張衛健經典劇集角色
上年年初無綫隆重邀請張衛健回巢拍攝《大帥哥》，劇集亦喺上年9月已經完成拍攝，之前仲有傳《大帥哥》由台慶劇淪為倉底貨。最近終於有消息，劇集將會成為今年壓軸劇並於12月3日啟播。《大帥哥》就嚟有得睇，相信唔少觀眾都會好期待。
早前自言欠香港人一部劇嘅張衛健終於都找數，喺呢個時候我哋就一齊細數下Dicky嘅經典劇集角色啦！
《老友鬼鬼》尚天堂（1991年）
呢套劇集係張衛健首次擔正嘅劇集，一睇個名就知係撞鬼啦！點解? 咪就係因為張衛健飾演嘅尚天堂，本來係一個爛賭嘅交通輔警，但係同溫兆倫飾演嘅齊亮聲產生誤會，之後佢兩個仲一齊愛上黎金妹（梁珮玲飾）。可惜尚天堂不幸身亡，但係佢對金妹念念不忘，所以佢想返回陽間搵金妹，仲想拉金妹落去同佢做一對鬼夫妻，期間佢仲上咗亮聲同若男（李婉華飾）身。另一方面，佢又發現自己同若男冥冥中有一段宿世姻緣。張衛健飾演嘅尚天堂活潑鬼馬，當中台詞「我哋係醒字派嚟㗎嘛」成為經典。角色深得觀眾喜愛，令佢一炮而紅。
《西遊記》孫悟空（1996年）
要講到經典角色，又點可以唔講孫悟空呢？張衛健主演第一輯嘅《 西遊記 》, 唔駛講情節大家都知套劇講悟空、豬八戒同沙悟護送唐三藏取西經架啦！淨係佢當年自創嘅口頭禪「 Yo！取西經！使乜驚啊！」大家都真係倒轉背都仲得！所以呢位「我係如來佛祖玉皇大帝觀音菩薩指定取西經特派使者花果山水濂洞美猴王齊天大聖孫悟空。」至今仍然係電視迷最認可嘅孫悟空，角色仲將佢推向演藝事業最高峰，不過之後Dicky選擇離開無綫向外闖。
《少年英雄方世玉》方世玉 (1999年）
當年由亞視播出嘅內地劇《少年英雄方世玉》紅遍兩岸三地，絕對係經典中嘅經典。張衛健喺劇中飾演機靈聰敏但又成日闖禍嘅方世玉，佢成功將角色發揮得淋漓盡致。另外，唔少觀眾都好鍾意佢同媽媽苗翠花（恬妞飾）嘅互動，佢同媽媽關係特別好，相處起上嚟朋友一樣！呢套劇係佢離開無綫後再度爆紅嘅作品。
《機靈小子》不懂（2001年）
由張衛健、李冰冰、聶遠、羅家英及薛佳凝等主演嘅古裝喜劇，講述明朝孝宗年間，以法規嚴謹著名的大寺院，點知就出咗個聰明伶俐、好酒又好賭嘅雜役小不懂（張衛健飾），並憑藉種種刁鑽古怪嘅思想幫孝宗度過難關、破案甚至係最後教書育人。張衛健嘅搞笑形象深入民心，今次呢個機警又多計嘅不懂，令佢人氣再次上升。
《小寶與康熙》韋小寶（2001年）
呢部劇來頭認真唔細，由王晶執導，搵嚟張衛健、譚耀文、鄭伊健、林心如、朱茵、舒淇等人主演。張衛健版本嘅韋小寶不學無術但係聰明伶俐，結合咗「賤」同「可愛」兩種不同風格，包保笑到你肚痛！當中韋小寶嘅口頭禪「涼風有信，秋月無邊。虧我思嬌情緒，好比度日如年，雖則我唔係玉樹臨風，瀟灑倜儻，但我有廣闊既胸襟，加強勁既臂彎。」更唱到街頭巷尾。
《齊天大聖孫悟空》孫悟空（2002年）
呢個版本就勁啦！除咗張衛健再次飾演孫悟空之外, 仲有許志安、梁漢文、Twins、恬妞、林志穎、謝霆鋒、 鄭秀文、大S、張茜等等參演，呢個完全顛覆咗原著嘅版本。連悟空都有感情戲，阿Sa蔡卓妍飾演嘅紫蘭仙子同孫悟空嘅愛情線，至今仍然令人印象深刻。另外，台詞「型到跌渣！」及「噼啪你個隆的咚！」成為當年嘅潮語。
《少年張三豐》張君寶（2002年）
舊酒新瓶劇情講述少年張三豐經歷江湖風波，如何成為一代宗師嘅故事！但係經由張衛健演繹呢個風趣幽默嘅一代宗師，唔知大家又鍾唔鍾意呢?
《小魚兒與花無缺》小魚兒 (2004年）
再一次同王晶合作，仲加埋同謝霆鋒一齊主演，劇集改編自古龍嘅經典武俠小說《絕代雙驕》，加入好多原創劇情。劇集雖然有搞笑成份，但劇情比較悲慘，小魚兒（張衛健飾）同花無缺（謝霆鋒飾）係一對自細失散嘅兄弟，故事中大部份講遇上佢哋嘅角色，最後收場都係全家死清光，令到小魚兒同花無缺成為名副其實嘅「絕代」雙驕。好慘呀!
沒有留言:
發佈留言