【報紙】義氣仔女逐個捉

日期: 2019年10月2日
來源: 晴報

【患難見真情】林子博「失業」八方支援如泉湧 娛圈人情味濃義氣仔女逐個捉 (節錄)

林子博效力無綫11年，舊年獲得「老人牌」，不料公司「棄將」同佢結束賓主關係，收到消息後子博患上罕見癌症嘅太太Shirley爆喊。不過子博完全冇怪舊東家，仲話無綫始終係企業，佢哋有佢哋嘅選擇。子博話依家單係租樓都萬幾，有一定嘅經濟壓力，但佢都好樂觀面對。

ViuTV力邀加盟，子博表示有興趣向節目及劇集方面發展，但就唔打算跑娛樂新聞，事關自己係無綫畀機會同監製帶佢出身，覺得倒戈好冇義氣。幸好已有兼職工作「送上門」，頓解佢燃眉之急。

「在家靠父母，出外靠朋友。」其實圈中都有好多義氣仔做到雪中送炭，真係做戲咁做，患難見真情！

梁漢文與張衞健

2001年梁漢文因拖欠供款，時值130萬元嘅保時捷跑車被財務公司拖走，好兄弟張衞健寫支票為他贖車，許志安亦借出50萬元畀佢紓困，及後他公開承認因要供車供樓、母親病重及弟弟升學令他入不敷支。