【報紙】恬妞想跟張衛健再合作

* 編按:
相關影片可以按這裡或這裡觀看。

日期: 2019年1月18日
來源: 頭條日報

向張繼聰王菀之偷師  恬妞想跟張衛健再合作

恬妞轉往內地發展10多年，去年在緣份驅使下回歸香港接拍林敏聰處男執導賀歲片《如珠如寶》，但唔好以為60歲的恬妞已out，她自爆一直以新人的學習態度去開工，喺對手張繼聰及王菀之身上學到最新嘅喜劇演繹方法，「以前演繹方式太誇張，o依家嘅年青人唔會接受，所以每個鏡頭我都當自己係新人咁去虛心學習，靜雞雞向佢哋偷師，哈！我梗係唔俾佢哋知啦，我第一次講咋。」

片中恬妞飾演一個幻想是大明星的乞兒婆，跟王菀之有好多對手戲：「咁耐冇返嚟拍戲，感覺香港同以前一模一樣，只係多咗一班新演員，我好欣賞新演員演喜劇方式，特別鍾意王菀之及張繼聰，佢哋用靜態去表達，呢個演繹非常好，要好好學習，唔可以再用老式演繹。同菀之合作過後我都好鍾意佢，兩個係真心真意，唔係為宣傳亂講。只要一句關心，一個眼神已足夠。今次唯一係拍煞科戲時收到姐夫岳華離世消息，人生經歷過兩次親人離開，兩次都係演喜劇中，真係好殘忍，好彩今次剛好煞科，想喊時就眈天望地分散注意力。」

香港人集體回憶

恬妞在經典劇集《他來自江湖》飾演的余姣，雖然是30年前的作品，但唔少觀眾仍記憶猶新。恬妞坦言一直想回歸拍戲：「我都好掛住香港，每次返嚟做私人嘢，喺街上都有好多人同我講，『你快啲返嚟呀！好想睇你做戲。』甚至試過坐的士，司機擰轉頭話：『你係恬妞呀？我認得你把聲呀！』噢！原來我嘅廣東話多年嚟冇乜進步。我最想同我個仔《大帥哥》張衛健再結緣，可以拍吓古裝，因為古裝扮相好睇啲，時裝要減肥好煩。」