來源: 都市日報
知遇之恩 張衛健
「我係花果山水濂洞美猴王，齊天大聖孫悟空！」當年無綫經典劇集《西遊記》內，張衛健所說的對白至今仍耳熟能詳，足足相隔20年他再回巢接拍劇集《大帥哥》，原來是因為他心裏一直有一把聲音告訴他：「我欠香港觀眾一套劇！」
張衛健（Dicky）當年拍完《西遊記》後離開無綫，甚至離開香港到台灣、北京發展，在紅極一時選擇離開令香港觀眾大感錯愕，「正當好多人等睇《西遊記》續集嘅時候，我突然宣布我唔會拍續集，我唔會續約無綫。由我離開去第二度拍戲開始，我一直有一個感覺喺個心入面，就係我覺得我同香港觀眾不辭而別！」
自主還恩情
20年後再重回無綫，Dicky表示很多朋友包括圈內人，其他導演和演員都不約而同地問他：「點解會返嚟拍劇？」Dicky說：「有啲人有啲恩應該要還嘅，就係珍姐（曾勵珍），仲有一個好重要嘅原因係一路壓喺我個心最底有一把聲音——『我欠香港觀眾一套劇！』」至於多年來一直沒有彌補心中的遺憾，是因為合約問題，「我離開無綫之後，不間斷地簽咗唔同公司，我就有一堆片約，要履行合約責任，我係連提出都唔敢，可以講係『人在江湖、身不由己』。」
6年前，Dicky有了工作自主權，曾不斷想起這件事，但令他決心答應接下無綫劇集的人卻是珍姐，「佢有一日搵我話『有冇可能幫我哋拍一套』，其實我冇話畀佢聽我心入面有一種欠香港觀眾一套劇嘅感覺。當年佢都幫咗我好多嘢，我要還呢個恩情。今日我可以自主同選擇工作嘅時候，就係咁應承咗！」當《大帥哥》開機後，Dicky隨即感到很不捨，「有一日開機前同自己講『你估呢個世界，會唔會有人可以話到畀你聽，下一次再用廣東話去拍一套劇又會係幾時？』我相信呢個世界冇一個人答到，包括我自己，下一套可能係明年，都有可能係Never Again，所以好唔捨得。」
翻開新一頁
當初宣布《大帥哥》為台慶劇，最終被抽起並放在12月播出，Dicky坦言沒有失望反而很開心，「睇到網上聲音話『還我大帥哥！』覺得好開心，如果部劇唔Delay變咗係台慶劇，任何嘢預期內進行都冇咩特別，反而Delay咗觀眾有呢啲聲音，會覺得好Warm，原來你哋真係咁掛住我，呢個係我開心嘅鐵證！」他又感謝戲中的4個兄弟洪永城、曹永廉、徐榮、李嘉；3個老婆蔡思貝、譚凱琪與楊秀惠及製作團隊在這半年的拍攝，看到每一位台前幕後都好用心同努力去拍。
由參加歌唱比賽到做演員，所有時間放在演藝事業上，Dicky期望可以繼續翻開人生新一頁作出新嘗試，去追求更多的可能性。早前他於藍潔瑛追思彌撒上誦讀經文，事後受訪，才發現兩人原來並不稔熟，是甚麼驅使Dicky有此舉呢？「今年年頭我弟弟（張衛彝Henry）去世，喺教堂舉行追思彌撒，而我從來都未辦過喪事，我行入去教堂嗰刻，個人仲係好迷惘，有個年輕人行過嚟同我握手話『今晚我係為你同亡者Henry，你弟弟呢個追思彌撒嘅讀經員，你好！』佢笑住講完呢一句就行開，佢用笑容同我講一句說話，感覺好Warm，我就諗我可唔可以做佢呢個崗位。」2019年Dicky希望可以嘗試做追思彌撒讀經員，雖然知道自己可能不適合，但唔試過又點知唔得呢！
沒有留言:
發佈留言