【報紙】洪永城讚張衞健係最佳演員

* 編按:
相關影片可以按這裡觀看。

日期: 2019年1月12日
來源: 蘋果日報

【Bye~軍曹】讚張衞健係最佳演員 洪永城：不在TVB見，在江湖相見吧

「寧做雞頭不做鳳尾」、「誰大誰惡誰正確」…《大帥哥》噚晚大結局，最終「馬炭」洪永城改邪歸正，幫助張衞健追殺蒙大帥，更叫咗張衞健一聲「大哥」，重拾「Keroro軍曹」呢段兄弟情，洪永城變番忠誠嘅Tamama，將手榴彈掟去蒙大帥嘅軍車，最終馬炭不幸犧牲，當中有兩幕幾感人，其中一幕洪永城喺張衞健昏迷中同對方告別，稱自己同羅義都鍾意飲洋酒，叫張衞健倒喺地下畀佢，最後洪永城微笑住講：「保重啦!大哥!」而另一幕係講張衞健為咗蔡思貝放棄做大帥哥，睇到網民眼濕濕，讚張衞健演繹得揮灑自如。

噚晚一眾演員約埋食飯睇大結局，馬炭洪永城今日喺Ig貼出同張衞健嘅合照，稱「大哥，你成功了」，又指「我知道對你來說，這些都比獎項來得重要」，洪永城指未同張衞健合作前，已經聽過張衞健嘅事蹟，試過一個半月連續拍西遊記冇返過屋企，「每朝早0600需要兩位劇務大哥抬你上車到拍攝場地，直至2800依然需要抬你返回電視城，聽說有次坐船前往西貢小島拍攝，你大字形的睡姿躺在船上，化妝師替你貼孫悟空的面毛，因為太專心，暈船嘔吐在你臉上」。

講到城中熱話離唔開大帥哥，洪永城覺得張衞健係一個處理戲裏戲外最好嘅演員，作為演員除咗演技之外，好多戲外嘅層面都要處理，將所有工作細節安排得妥當，洪永城記得張衞健曾經講過「我份人一係唔做，一做就做到最極致、最好」，今次唔只教佢演技，仲教曉佢要有毅力去解決問題，同埋要有領導能力。

洪永城指張狄奇係最佳演員：「多謝你，多謝你這段時間帶領着我，也帶領着觀眾們，享受這兩個月的娛樂。『你瞧這些白雲聚了又散，散了又聚，人生離合，亦復如斯。』不在TVB見，那就在江湖相見吧。」洪永城暗示張衞健真係暫時唔再拍無綫劇。

洪永城今日回應傳媒就話：「好開心係咁多觀眾鍾意呢套劇集，一個感動嘅ending，唔開心係播完，同呢班大帥哥兄弟姊妹就會少見面(咁想唔想有續集?)套用大哥所講咩都有可能。」洪永城話封信係朋友幫佢代筆寫，「除咗網上keep住啲文之外，將來都可以睇番封信。」

而張衞健都喺微博留言多謝大家支持：「我聽說我的角色陪伴着一些朋友的成長，但我更感恩的是到了今天還可以在你們心中佔著一塊小小的角落！謝謝你們對《大帥哥》的支持！願天主保佑我們在人生路上繼續努力前進，不負愛我們的人吧！」

============================================================

洪永城今日喺Ig講：「不在TVB見，那就在江湖相見吧！」

噚晚佢將一封由朋友代筆寫嘅信送畀張衞健。

有時感謝嘅說話唔會講出口，但會用文字表達。

呢張相係《大帥哥》最後一日拍攝影嘅。

呢個就係信中嘅內容。

噚晚《大帥哥》大結局，之前網民估羅義扮死，結果羅義係冇「翻生」。

「馬炭」洪永城就改邪歸正。

馬炭喺夢中與狄奇對話，希望得到對方原諒。

兄弟冰釋前嫌。

狄奇醒番，先知馬炭已死。

結尾講蔡思貝想離開狄奇。

狄奇為咗蔡思貝連大帥哥都唔做。

個樣咁深情，難怪網民讚張衞健演繹得揮灑自如。