【報紙】健仔頻呼阿嫂玩謝李彩華

日期: 2004年12月3日
來源: 太陽報

健仔頻呼阿嫂玩謝李彩華

電視劇《功夫足球》尋日舉行首映會，張衛健、吳文忻、阿Rain李彩華（前名李彩樺）同佢既緋聞男友兼監製蕭定一齊齊出席。玩遊戲時，蒙嘉慧、黃伊汶（Emme）等靚女要用各種方法圍健仔，輪到阿Rain個陣，健仔即時阻止佢出招，仲叫佢做「阿嫂」，踢爆佢同蕭定一既情侶關係：「阿嫂你唔好亂嚟！你効我心目中就當係老母咁尊敬你！」搞到阿Rain好尷尬，健仔仲係諸事姐面前讚佢地男才女貌。

不過，阿Rain死都唔肯要「阿嫂」呢個新朵，佢話怕以後少左好多機會喎！唔做「阿嫂」，阿Rain就同諸事姐講，老闆娘林太搵高人同佢睇過，話佢身份證個名「李彩華」仲好過「李彩樺」，所以由尋日開始就唔用李彩樺，以後一於行不改名，用番真名。另外，Emme趕去首映會個時，佢架保母車撞到一個好似飲醉酒既男人瞓係馬路度，好彩對方冇事自己起番身，不過Emme就嚇餐飽！

呢頭健仔搞宣傳活動，佢同王伯昭單嘢就係懷柔法庭開審，係庭上仲播埋段打人戲。王伯昭同健仔都冇出庭，不過王伯昭個律師就覺得影帶經過剪輯，唔係原帶！據諸事姐了解，單案仲要繼續審，睇怕都要拖一排呀！