【雜誌】Sammi安仔吹雞開年

* 編按:
雖然我好想Big Four快D再開演唱會，亦都好想張生唱番多D歌，特別係廣東歌，
之但係印象中梁漢文好似轉左會冇幾耐咋喎! 記者吹到咁大呀?

日期: 2014年2月5日
來源: Face，第350期

大日子　派夫姓利是　Sammi安仔吹雞開年

11年翻撻、去年 12月傳出婚訊，許志安同鄭秀文呢一對雖然再三澄清係訂婚、並非成婚，不過禮未行又有乜所謂，新年流流兩人以「伉儷」姿態留港度歲兼吹雞賀年。

本刊收到風， Sammi當正自己許家新抱，派緊「許」姓字樣大利是添！二位一體甜到咁，婚禮、宣誓嗰啲形式嚟啫，搞唔搞都一樣！

未過門先話事

12月訂婚後，出埠為過二人世界樂得清靜，留港就梗係熱鬧與眾同樂。據 Sammi友人透露， Sammi、安仔過年前一早預告圈中好友農曆年行蹤，Sammi樂於以「許太」身份做搞手，新正頭吹雞兩次與友暢聚，叫齊圈中朋友年三十食完團年飯，意猶未盡再於年初二原班人馬到西苑開年。

開年飯一對對。

「 Sammi近排成日同班圈中姊妹講，話自己係『潮女』，潮州女仔呀，結咗婚乜都要聽曬老公話，睇老公頭做人喎！佢今年過年仲十足十賢內助一樣，全盤揸弗幫安仔搵利是封、包利是，雖然未係兩公婆，不過初二餐開年飯，佢哋兩個已經老夫老妻一樣，利是派得好熟手，成班朋友都替佢哋好開心！」據知，兩人正物色一位牧師，為人生大事做準備。

先拜年後拉隊

年三十的團年飯及年初二的開年飯，一樣係許氏伉儷吹雞，設宴銅鑼灣利園二期的西苑貴賓房，而座上客都是原班人馬，包括張衞健夫婦、蘇永康及未婚妻、雷頌德夫婦及歐陽德勳、蔡立夫婦，初二再聚，則多了梁漢文夫婦。等到「梁炳」從英國賀完「 Dr.陳奕迅」後回來，年初二總算等到「 Big 4」齊腳，開年之餘亦一心等齊腳商討來年大計。

在私係好兄弟、在公 Big 4亦有叫座力，據悉許志安過年落足嘴頭拉梁漢文、蘇永康過檔，再叫埋自由身的張衞健加盟太陽娛樂。

年初剛從東亞過檔至太陽娛樂，安仔有意拉攏 Big 4、雷頌德等拉大隊過檔重投黃柏高旗下大展拳腳；而終極目標是帶埋現時自由身的 Sammi做太陽娛樂夫妻檔。據知 Sammi同經理人郭啟華一樣沒有約被東亞綁死、潮州女人 Sammi又愛做跟得夫人，馬年夫妻檔極有機會成事喎！