【網絡】張衛健相隔20年重返無綫

* 編按:
連日來都睇到好多有關佢既新聞，好開心~~
其實.... 各大報章同網媒既記者同小編們可唔可以做下功課先寫稿呢? 同埋D用字又可唔可以俾返少少水準呢?
不過~ 依篇既依句「不過可惜從此之後，香港嘅觀眾就好少有機會再喺香港見到張衞健。」就中到應一應。

日期: 2016年11月17日
來源: Yahoo 娛樂新聞

相隔20年重返無綫 張衛健不計前嫌回巢救亡?

齊天大聖孫悟空雖然長拍長有，不過喺好多人心目中孫悟空只有一個！就係張衞健（Dicky）。當年張衛健憑著出演電視劇《西遊記》飾演齊天大聖孫悟空而紅透半邊天，佢嘅金句：「我係花果山水濂洞美猴王齊天大聖孫悟空。」﹑「Yo！取西經！使乜驚啊！」等個個小學生都跟住講。

根據無綫一貫作風，電視劇收得當然要開續集啦！有傳當時已經成為一線男星嘅Dicky，喺傾續約嘅時候要求加薪被阻，於是佢就心灰意冷離開無綫去北京發展，而第二集嘅《西遊記》就由陳浩民頂上。

不過唔知係咪張衛健真係同孫悟空咁有緣，佢喺2002年就有機會再次拍攝由兩岸三地同日本公司聯合製作嘅《齊天大聖孫悟空》，又再次翻起第二次嘅孫悟空熱潮。不過可惜從此之後，香港嘅觀眾就好少有機會再喺香港見到張衞健。

不過今時唔同往日，依家正經歷小生花旦荒嘅無綫，為咗挽救收視，兼且為咗慶祝50週年，不斷邀請一班老戲骨回巢，好似蔡少芬、羅嘉良、宣萱及馬浚偉等等就已經確實會返去無綫拍劇。而最令各位估唔到嘅就係，有傳離開咗20年嘅張衛健竟然肯回歸，仲會主演《鬼同你OT》的監製徐正康嘅新劇。