【報紙】洪永城約大帥哥老婆去獵食

日期: 2019年3月25日
來源: 東方日報

竟敢飛甩主角! 洪永城約大帥哥老婆去獵食

無綫劇集《大帥哥》年頭播出時個個爭住睇張衞健重返無綫做「大帥哥」，仲要一人攬三個老婆蔡思貝、楊秀惠及譚凱琪，有演技有噱頭，真係好鬼入屋，大受市民歡迎。雖然套劇完咗一段時間，不過劇中多位主角都仲係咁Friend底，劇中演忠變奸再變忠嘅「馬炭」洪永城，佢就約齊大帥哥三位靚老婆又飯局又睇戲，不過佢就相當大膽喇，竟然飛甩主角張衞健！

係大膽嘅！

四人行喎，唔知洪永城會唔會畀女朋友扭耳仔呢？

譚凱琪（左起）、楊秀惠同蔡思貝呢個姐妹裝又OK喎～

當中洪永城同楊秀惠都喺社交網甫出合照，相中三位女士都不約而同戴上白色Cap帽，仲要素顏上陣，認真畀面，佢哋仲晒出飛尾話齊齊睇完戲，而洪永城仲走去Tag埋張衞健道：「大帥哥，我發現咗你啲老婆夜晚出去獵食。乜依家女士潮流興帶白色帽嗎？」嘩！依家約人哋「老婆s」出去玩都咁明刀明槍嘅？！