【報紙】張衞健激讚蘇永康紅館騷抵睇!

日期: 2019年3月11日
來源: 東方日報

蘇永康備戰紅館減17磅　張衞健激讚抵睇！

蘇永康（阿公）為6月21至22日與中樂團合作的紅館騷「蘇永康ALL THAT JAZZ & POP LIVE 2019」舉行記招，甫開始先播出多位好友的恭賀兼打氣片段，有草蜢、梁漢文、任賢齊（小齊）、謝安琪、容祖兒（Joey）、張衞健（Dicky）、楊千嬅、陳奕迅（Eason）等，其中小齊笑話要同阿公齊齊Keep弗；Joey及Eason舉手話要幫手湊囝囝Jazz；壓軸出場的Dicky就大帥哥上身，一口氣狂數阿公的金曲名，還化身購物平台主持力Sell門票，不斷話「抵睇」！身穿藍色花花西裝的阿公明顯清減不少，他笑言由年初八開始做運動，經過20幾日的努力，成績都不俗，成功減去17磅！

老友張衞健力撐！

講到「大帥哥」張衞健拍片祝賀，問到他會否做嘉賓？阿公重申片中好友一定會來睇騷，但未必會上台：「中樂團成86人，最困難係樂譜。」問到可會想加場？阿公大爆是次個唱是歷年來最貴製作費：「成本貴過晒排舞同搵Dancer，又要上廣州綵排，啲中樂團嚟要包佢哋酒店，雖然好貴，但想做。（太太會幫手衫方面？）佢係唔會理我啲衫，又唔畀我買衫。」

問到如何分配湊B時間？阿公指每朝都會同囝囝Jazz玩。講到被影到同囝囝去國際英文幼稚園面試，阿公透露今日會知結果，問到一共見了多少間幼稚園？他迴避謂：「幾多間呢啲唔講啦，邊有家長淨係見一、兩間。」