【雜誌】Big Four向fans𢭃利是

日期: 2013年2月21日
來源: 3周刊，第698期，好姨廣場

張衛健全裸示眾 BIG FOUR向fans𢭃利是

張衛健、許志安、蘇永康同梁漢文舉行一連6場《THE BIG FOUR大家利事世界巡迴演唱會2013》，由年廿九在紅館開鑼到情人節，與全場一萬二千多觀眾迎接新春，而且每晚全場都座無虛席，場場有嘉賓包括吳國敬與Joey Tang擔任表演。由於今次四子演唱會主題都是新春「利利是是」，張衛健就被許志安、蘇永康同梁漢文挖苦，笑佢每年都避年唔派利是，健仔當然即時反駁，仲笑話：「係呀！每年由聖誕避到清明，不過唔可以留到重陽，因為要趕及返來裝香俾你。」不過許志安、蘇永康同梁漢文無就咁放過健仔，又玩翻舊賬，取笑佢三年前紅館BIG FOUR騷蜈蚓彈失手，要佢再公開表演，唔成功就屈佢即場派出港幣三千蚊利是俾幸運觀眾，結果健仔再失敗，唔見三張「金牛」。之後他們又互相扮經典造型，期間健仔扮許志安全裸拍攝慈善寫真集甫士最爆笑，他穿上假大隻佬扮赤裸，還在下體重要部位以「格子」遮掩，事後安仔還笑到出唔到聲。

雖然張衛健向觀眾豪派三千蚊大利是，但小財唔出，大財唔入。年廿九當晚，四子由龍年唱到蛇年，當演唱會踏入12點，佢即時換上「利市裝」陪觀眾倒數，一邊唱新年歌，一邊用身上袋收利市，個個都載到盤滿砵滿，三千蚊「成本」可謂有賺！之後好姨仲見到鬼馬既健仔玩到跌倒，幸好只係有驚無險，而許志安被粉絲拉扯、梁漢文狂收禮物，蘇永康被觀眾拉住合照，非常熱鬧 。