【報紙】張衛健上台講鹹濕笑話

日期: 1999年7月26日
來源: 太陽報

張衛健上台講鹹濕笑話 安仔尾場個唱變III級Show

許志安只演七場的《真心真意99演唱會》前晚於紅館成功落幕。個唱中不時有近乎三級的演出，安仔（許之暱稱）與男舞蹈員大跳貼身舞，又扮晒Kiss，而他與特別從北京趕回來的張衛健又分別大講有味笑話。

健仔（張之暱稱）更笑言他日安仔與Sammi（鄭之洋名）洞房時，要在旁唱《足球小將》打氣咁話。呢種究竟係乜野死黨嚟？

安仔前晚尾場個唱可謂加料演出，更險成三級騷。事緣之前六場均未能出席的張衛健，前晚竟在安仔唱《真心真意》期間突然上台，除嘲笑安仔嘴唇厚得似牛扒外，又大講有味笑話。

健仔對安仔說：「我知你好感動，但喊唔出唔好夾硬谷，呢套Out晒喇，你喊一萬次我都唔會愛上你，除非你同個隻野（指鄭秀文）結婚洞房個晚，俾我瞓中間，我最多唔觀戰只聽聲，我仲可以間中畀意見，同你打氣唱首《足球小將》，攻呀攻快搶攻，射呀射射她吧。」此時全場觀眾笑聲震天，連安仔都笑到彎低身不能反擊。

當安仔向觀眾提到自己練健身時，又講鹹濕笑話，他說：「男人最怕舉唔起個啞鈴，教練話我舉得幾高，個啞鈴呀，細路仔要掩耳仔呀。」

喉嚨勞損唱到嘔血

另外，有一環節是安仔與舞蹈員跳「棍舞」，不過安仔昨晚明顯加料演出，與一男舞蹈員面對面雙腳互夾之外，又與其嘴對嘴互錫，安仔事後亦說：「今晚Feel到，咪性感一點囉。」

安仔開個唱，女友鄭秀文可謂成為半個主角，觀眾不時大叫Sammi名字，安仔所有老友上台都以她作為嘲笑對象。不過，相信Sammi亦無暇生氣，皆因安仔竟嘔血，安仔說：「我同葉德嫻唱歌時，拎條毛巾咳一咳，之後助手話我咳左血出嚟，之前我感冒未清，又食蛇膽，係燥得滯喉嚨勞損啩！」