【報紙】蘇永康看守所睇張衛健電視劇 (節錄)

日期: 2002年8月14日
來源: 太陽報

蘇永康風騷檻火盆高呼：霉氣去好運來 (節錄)

被判入台北看守所觀察勒戒十一天的蘇永康，前日下午獲釋，並於昨午在台灣舉行記者會，康仔全程笑容滿面，當檻火盆時更風騷高呼︰「霉氣去，好運來。」

看守所睇張衛健電視劇

記︰你係看守所入住雙人房，又唔需要剪短頭髮，離開又有專車接送，似乎有好多特別優待。

羅︰總之會尊重看守所規定，蘇先生既生活與看守所規定係一樣。

康︰我唯一提出既要求係放風唔需要外出，因為知道香港傳媒走到屋頂拍攝，為免佢辛苦，所以申請唔外出，呢個係唯一唔同，其他基本上都係一樣食三餐，入面既多士唔錯，食完晚飯後有空間思考同睇書，亦可以睇新聞、聽收音機；電視係用電芯，電芯只維持兩小時，每晚七點睇完新聞後，八點就可以睇張衛健既電視劇，所以呢兩個星期內既新聞，我都有留意，好精采呀！立委鬧出既三角戀都好精采。