來源: 蘋果日報
《Big4大四喜》大逼供
楊千嬅同丁子高去年神神秘秘喺拉斯維加斯註冊結婚，點知俾本報踢爆，一對新人將會喺年尾喺香港補擺喜酒。事前千嬅一直話未到擺酒嗰日都唔會同老公一齊現身，但係日前佢哋就肩並肩坐埋一齊接受無綫生活台《 Big4大四喜》嘅訪問，預演婚禮時被玩嘅情景。
千嬅同老公丁子高俾 Big4四子逼供，甚至連兩個嘅閨房事都要攤開嚟講。
講到呢段姊弟戀，丁子高話姻緣係一早天注定，佢話：「我屋企人一向都信命理，我記得喺我一歲時，媽咪曾經同屋企人講過喺07至08年間，會有一個屬牛嘅女仔入家門，估唔到預言成真。」呢啲就真係信不信由你。
丁子高上海逃情
千嬅就透露話一次唱片公司同事請佢去友人嘅生日派對而識丁子高嘅，之後再由 SMS溝通慢慢發展，千嬅甜笑話：「嗰日朋友早走，佢叫丁生幫手照顧我，估唔到一直照顧到家。」
不過幸福背後雙方都要付出努力，原來感情啱啱開始嘅時候，佢哋兩個都受到考驗，因為當日有好多傳聞，搞到雙方家人都對呢段感情產生質疑，搞到丁子高曾一度想放棄，仲走返去鄉下上海，但經過兩個月嘅思考，丁子高終於克服心理障礙，決定要同千嬅一齊。
安仔行房要暗示
節目中 Big4向千嬅同丁子高逼供，要佢哋同大家分享甜蜜趣事，千嬅竟踢爆老公瘀事：「佢好鍾意喺屋企放屁，有時仲專登喺被度放，真係瞓着都會臭醒！」
之後再問到千嬅同丁子高嘅閨房事，問假如其中一方想行房會有乜暗示，丁子高好大方話：「唔使特別暗示，兩人喺床上自然有默契。」而安仔被問同一問題，佢話只要做啲平常唔會做嘅嘢，另一半會明白佢意思。
沒有留言:
發佈留言