【消息】旅發局《夏日流行音樂節》

日期: 2010年6月4日
來源: 蘋果日報

《獅子山下》金曲暑假有得聽

旅發局舊年見豬流感、金融海嘯接連襲港，牽頭同演出業協會搞咗一個馬拉松式嘅夏日流行音樂節，刺激吓旅遊業，點知慘淡收場，埋單計數仲蝕咗七位數字金額。鬼咩，音樂會選址機場亞洲博覽館，仲要聽足8粒鐘。有時啲嘢唔係大件夾抵食就得，要畀時間內地客 shopping先掂 o架。

田少話今年夏日流行音樂節以《獅子山下》懷舊金曲做主打。

旅發局今年學精咗，再次喺暑假舉行音樂節，但改喺紅磡體育館開 show，演出時間減為4個鐘，仲以《獅子山下》為主題大玩近年煞食嘅懷舊 feel。

本地歌手演唱

旅發局主席田北俊噚日公佈詳情，好坦白同小妹講，舊年音樂節啲歌佢好多都唔識，今次以懷舊金曲做主打，又會喺內地推廣音樂節旅遊票套餐，好有信心全場會爆晒。
講到咁有信心，有乜嘢歌手先？演出業協會主席陳淑芬話，今次飛起咗外地歌手，全部由本地薑包辦，計有 Big Four（許志安、張衛健、梁漢文、蘇永康）、草蜢、容祖兒同鄭伊健，大唱羅文啲金曲，將本地同內地客一網打盡。音樂節喺8月27同28日開兩場， $480、 $280同 $180三種門票，下月開賣， Manhattan Card會員獨家由6月14日起優先訂購。訂票熱線：28611611。

同田少傾得好哋哋，突然收到 Angus號遊艇代理 Jose電話，佢話唔好意思早幾日講錯咗啲遊艇資料，遊艇最多可以容納55人，跳水台係用作救生瞭望台。