來源: 蘋果日報
聞Sammi緋聞 安仔Cool爆嚇窒 Big4
鄭秀文同許志安02年分手，近期屢傳復合，仲越傳越熾熱；雖然安仔已有多年女友余德琳（ Michelle），但 Sammi近日回應復合傳聞時又話冇辦法預計下一步，令到佢哋嘅關係更加撲朔迷離。點知噚日忽然傳出37歲嘅 Sammi同住喺半山蔚皇居、28歲嘅余文樂撻着譜姊弟戀，仲話佢哋拍拖放狗㖭！
Sammi：一頭霧水
家陣喺台灣宣傳國語福音歌嘅 Sammi，噚日回應話：「一頭霧水，只喺電梯見過余文樂幾次，根本唔知道佢住邊一層？可能係大家覺得我太耐冇談感情，幫我搵對象。」余文樂一樣對緋聞失笑話：「我同鄭秀文只係鄰居，撞過幾次，見到面當然有打招呼有傾偈，不過我見親 Sammi嘅話題都係『小心呀，出面有狗仔！』」問佢覺得 Sammi為人點？佢話：「好 nice，好有 energy，見佢為演唱會操得好勁，真係好有毅力！」
許志安面對鄭秀文同余文樂嘅緋聞舉止異常，令 Big4其他成員即乖乖收口。
Sammi同余文樂嘅緋聞，惟獨許志安反應最大。安仔噚日喺淺水灣錄影《 Big4大四喜》，一問到 Sammi嘅緋聞，佢就煞有介事話：「唔回應。」係咪怕女友呷醋？有冇戥 Sammi開心？佢繼續播帶話：「唔回應。」同場蘇永康、張衞健初時仲玩玩吓贈興：「好喇！你終於甩難喇。」但轉頭見到許志安木無表情， Big4成員即全部收口，齊齊話唔回應。
沒有留言:
發佈留言