【報紙】鬥髮鬥巨雀 Lam4 撼 Big4

日期: 2010年6月4日
來源: 蘋果日報

鬥髮鬥巨雀  伊健草蜢組「Lam4」撼 Big4

鄭伊健、 Big4、草蜢同容祖兒噚日出席喺黃埔舉行嘅「香港夏日流行音樂節」記者會，演唱會喺8月27、28日喺紅館舉行，以獅子山下做主題，今年係羅文入行40周年，會有一 part向籮記致敬嘅表演。

寸健仔冇頭髮

伊健同草蜢嘅經理人都係林珊珊，噚日佢哋一齊做訪問，就自稱係「 Lam4」，問佢哋憑乜同 Big4撼？蔡一智話：「都唔使撼啦，一睇就知我哋贏，淨係鬥頭髮我哋都贏晒啦。」許志安同伊健都被人話過佢哋巨雀，兩個咪可以鬥大囉，伊健即刻好尷尬話：「你哋冇睇過草蜢佢哋三個啫。」阿智話：「可能喺女人心目中你係大呢。」搞到伊健口啞啞。

鄭伊健同草蜢嘅經理人都係林珊珊，所以佢哋自稱「 Lam4」嚟搞笑。

Big4知道伊健佢哋嘅挑戰，竟然叫佢哋睇住衰三年，都好毒。

Lam4擺明挑戰 Big4，仲明寸張衞健冇頭髮，健仔梗係唔輸蝕：「同佢哋鬥長命囉，個4字亂咁用嘅咩？睇住衰3年呀，佢哋姣，你估我哋妖唔起呀？我哋妖起上嚟嚇死你呀。」

安仔否認復合

安仔最近被指因為鄭秀文激嬲女朋友 Michelle，女友仲搬走埋，問佢真定假？安仔話：「自我懂性開始都未試過同人同居，以前同阿爸阿媽住，依家同阿哥阿嫂同埋隻狗住，都冇同居過，不攻自破。」講佢信主得 Sammi，安仔話：「信仰唔係用嚟交換同得到啲乜，係好純潔。」咁佢同女朋友感情又點呢？佢話：「我一向處理感情事都好低調，總之一切如常。」

另外，有傳安仔會拉攏埋梁漢文同蘇永康去東亞，安仔話從來冇做過中間人，健仔就抵死咁話：「我噚晚發夢見到林建岳話簽我，仲話捧我同 Sammi做情侶檔，我開心到笑醒咗。」祖兒噚日喺台上影相時，突然有個燈罩從高處墮下，跌正喺佢側邊，嚇到佢花容失色，好彩冇受傷。