【粉絲】真正嘅齊天大聖, 只有張衛健一個!

來源: 熱新聞 Yes Pick 投稿
作者: Charlie
日期: 2016年2月22日

真正嘅齊天大聖, 只有張衛健一個!

有兩套古裝劇，無論TVB幾時播，小編應該都會睇，百看不厭個只。一套係張衛健1996年版嘅《西遊記》，一套係陳浩民嘅《封神榜》。而內地劇無論斥資幾多錢，都拍唔出個種味道。

今年係猴年，就算唔係猴年，改篇《西遊記》嘅電影電視劇都唔少，但小編心目中嘅「花果山水簾洞美猴王齊天大聖」孫悟空只得一個，就係「型到跌渣」嘅張衛健。

每次睇1996年個版本，都覺得好睇嘅嘢唔需要貴，有好演員有劇情就夠。最鍾意係《盤絲洞》個段，大蜘蛛精詩詩同蜈蚣精玉書條感情線，仲有三蜘蛛精恩恩單戀孫悟空，每次都要追。

除咗妖精搶鏡，四師徒各自性格鮮明，火花四濺，黎耀祥做嘅豬八戒同麥包做嘅沙僧入型入格，去到依家小編無論睇邊個新版《西遊記》，都覺得四師徒嘅形象就應該好似佢哋咁。順帶一提，96年《西遊記》嘅主題曲，詞曲都好正，依家聽番都琅琅上口。

為《西遊記》加入感情線呢個劇情，小編一向都覺得好贊，去到2002年嘅《齊天大聖孫悟空》，感情線發展再進一步，四師徒各自對愛情有領悟，塑造出另一番感覺，佢哋唔再係只會斬妖除魔嘅神，仲可以係至情至聖嘅人。當然小編依然會留意配角嘅感情線，紫薇仙子同哪叱就係其中之一。

然後，難忘《三打白骨精》被改篇為白骨精因單戀孫悟空而被打三次嘅情節，因為小編鐘意白骨精，覺得佢靚過紫蘭仙子，所以小編想佢哋係一齊多啲。

張衛健完完全全成為小編心目中孫悟空嘅最佳飾演者，而好記得個陣片頭曲段RAP到依家都識背，有小學同學試過罰企個陣噏咗句「逼巴你個隆地咚」被老師聽到，然後問佢頭先講咗啲咩。

所以相隔20年，中間無論有幾多套新嘅《西遊記》，都取代唔到張衛健演嘅地位。而佢除咗係小編心中嘅孫悟空，亦係小編心中嘅韋小寶，事關當年佢套《小寶與康熙》同樣經典，「涼風有信，秋月無邊，虧小編思嬌嘅情緒好比度日如年，雖則小編唔係玉樹臨風，瀟灑倜儻，但小編有廣闊嘅胸襟，加強勁嘅臂彎」又係倒背如流。

以前真係電視劇汁撈飯，但依家小編真係計唔到有幾耐無煲過TVB播嘅劇。成日上網一再重溫返啲舊劇舊歌，就會十分懷念以前追電視劇嘅日子，果然係光陰一去不復返。