來源: 晴報
送港人心靈雞湯 張衞健4分鐘點醒廢青
相隔廿年張衞健難得回巢TVB，雖然失落視帝寶座，不過一眾網民依然力撐他是心目中最好的男主角。而《大帥哥》最近一集講張衞健為籌措軍費徵收人頭稅，民怨沸騰，於是接納蔡思貝建議退稅。張衞健一計不成，決定舉辦盆菜宴先哄大家開心，再向軍人痛陳利弊，遊說他們站起來攻打祿豐鎮，藉以克服目前的財政危機。結果這場一人演講非常熱血，狂爆金句不特止，仲句句勁精警，令不少網民都受到鼓舞：「啱晒俾我哋啲廢青聽」。而張衞健解釋設計台詞時特意加入很多人生哲理，讓《大帥哥》更有深度：「希望給觀眾娛樂的同時，給他們傳遞些正能量。」，咁花心機，難怪網民咁鍾意佢啦！
一人演講4分鐘 狂爆金句點醒廢青
劇中他張衞健坦然冇錢、冇軍費出糧予軍隊，所以唯有叫大家直接攻下祿豐鎮。不過其實那些軍人只是臨時幫手的普通鎮民，訓練時間太短，體能差、技術低，很多人抱著得過且過的態度生活，認為出手就是蝕底一方。即使知道其他鎮的軍閥將會攻打自己家園，大家都沒有太大鬥心，反而只關心有冇糧出。最後張衞健為了激勵軍人士氣，親自在台上發表戰前演講，句句金句都勁精警、易記兼震撼人心，仲要邊講邊用動作加強語氣：
「大家必須主動出擊，不能被動」
「依家嘅處境，我哋唔係話不進則退，係不進則亡，死亡個亡」
「我就喺你最睇唔起我嘅時候，我就喺你認為自己半臂都能夠打得贏我嘅時候，我就一拳打死你，等你死咗都唔知咩事」
「我唔敢話我係毛都未出齊，就要飛上技頭變鳳凰嘅人，但起碼都拍吓翼，飛佢兩嘢」
「有時大智慧未必勝得過小聰明，唔係邊有蠻拳打死老師傅啊？」
「依家我送你哋八個字：『寧做雞頭，不做鳳尾』」
這場戲完全是張衞健個人show off時間，全長歷時4分鐘，一句廢話都沒有，甚至猶如心靈雞湯一樣，有令人鼓舞的感覺，不少網民都大讚夠晒正能量：「啱晒俾我哋啲廢青聽」。
證明喜劇都有深度 借對白傳遞正能量
其實大帥哥一角雖然表面浮誇，但都有正經時候，每次在其他人前面搞完笑，之後就會在背後除低面具，是個內心善良、樂觀的英雄人物。雖然套劇以喜劇作為定位，但張衞健不想做一個純粹讓大家一笑而過的喜劇，他想讓自己的喜劇有些內涵、深度，所以除了人物刻畫上花了心思，也特意在台詞裏放了很多人生哲理：「我想將喜劇同成熟結合埋一齊，咁就要花好多心思，所以今次喺個餡度包咗心靈雞湯。大帥哥呢個人哪怕天冧落嚟都會用微笑面對，呢個係我想釋放俾觀眾睇嘅，就好似我喺裡面講嘅台詞咁：『呢一秒唔放棄，下一秒就有希望』如果觀眾感受到又有所幫助就最好不過，如果感受唔到，就當喜劇睇。」
心靈雞湯對張衞健的成長好重要，他指自己是看心靈雞湯長大，才可保持樂觀、開心。見到香港充斥負能量，張衞健決心借對白傳遞快樂，給年輕人幫助：「我唔係咩重要人物，只可以俾觀眾娛樂嘅同時，再傳遞啲正能量。我想用一個哥哥嘅身份，用有血有肉嘅故事帶出後面嘅意思，年輕人可能會比較聽得入耳。呢套劇主題曲叫《大無畏》，就係想話俾大家聽唔好咁易放棄，人生係有好多困難，但正正係人活下去嘅動力，總係一帆風順又有咩意思呢？」
沒有留言:
發佈留言