【報紙】張衞健話拍到攞獎為止

* 編按:
相關影片可以按這裡觀看。

日期: 2018年12月12日
來源: 蘋果日報

【阿媽讚楊秀惠好戲】講到明恨獎 張衞健話拍到攞獎為止

楊秀惠投資嘅新店今日喺將軍澳開幕，請嚟一班好朋友包括最近憑主演劇集《大帥哥》人氣再度急升嘅張衞健（Dicky）、洪永城、徐榮、李思欣及周家蔚現身支持。

雖然Dicky今日玩快閃，但就不忘搞氣氛同表明想攞獎，當傳媒要求Dicky同楊秀惠合照嗰陣，Dicky就抵死地話：「佢好高，我好蝕。」Dicky恭喜完對方後話：「噚晚我車住阿媽，佢話同你做大帥哥嗰個做得好好，話係乜妞，最後叫咗恬妞。」楊秀惠即場叫Dicky幫手為台慶頒獎禮拉票，Dicky話：「最緊要觀眾鍾意，獎項方面，俾我咪下年再拍，後年再俾囉，唔俾咪一年拍一部，拍到俾我為止囉。」佢又搞笑話：「唔想搶人風頭，停車場費好貴。」之後就極速閃走離場。

大帥哥張衞健都有出現。

Dicky話阿媽睇完楊秀惠演嘅艾妞，大讚對方好戲，但就將艾妞講錯做恬妞。

Dicky以「停車場費好貴」做理由，極速閃走。

楊秀惠新店開張，一班圈中好友到場支持。

噚晚《大帥哥》劇情講述楊秀惠飾演嘅艾妞，被徐榮演嘅羅義拯救後同大帥哥重聚，連場喊戲逼真又激動，秀惠話：「場戲出咗後收到好多意見，自己睇完都一路喊，好多謝張衞健，其中一場講我返到屋企嘅戲，佢專登全部幫我度過，變到好人性化，拍時都喊到收唔到聲。」之後好多網民都睇好楊秀惠攞女配角獎，佢話：「得到大家支持已經好開心，攞唔攞到獎唔重要，最緊要係獲得認同，今日舖頭又開張，已經係雙喜臨門。」