【報紙】「反枱」爆F字嬲到成世光頭

* 編按:
相關影片可以按這裡觀看。

日期: 2018年12月11日
來源: 東方日報

張衞健「反枱」爆F字嬲到成世光頭

張衞健（Dicky）強勢回歸無綫拍劇，其90年代獨門搞笑演繹依然被劇迷受落，今被捧為「民間視帝」的他重提當年被踩「冇毛冇價值」的奇恥大辱，嬲到要爆「F」字英文，更直認以一世光頭證明自己「冇毛勝有毛」！

Dicky在劇集《大帥哥》的演出回響極大，「張衞健式」演繹被指有料跟無綫一眾親生仔爭視帝。不過22年前，有傳憑「孫悟空」一角爆紅的他，因要求加人工而被寸「你冇毛冇價值(o架)！」令他一氣之下離開娘家。

講起當年受辱的事，張衞健直認堅嬲！

日前Dicky接受專訪，表示要為無綫澄清：「其實（講呢句說話）嗰位係電影界嘅前輩，佢約我去酒店Coffee Shop傾電影嘢，個角色唔使黐毛嘅，不過原來有啲人為咗壓價，可以去到咁盡，嗰句說話真係Hurt到爆，嬲到立即埋單走人。」他指當時的心情不能只用Hurt來形容，簡直是扼殺一個正搏殺中的年輕人，又說：「嗰陣我真係有諗，我唔係孫悟空就唔得嘅呢？咁死啦，我嗰時30出頭咋！」

見到面都唔尷尬

Dicky婉拒透露對方名字，但直認被打沉時堅嬲：「我諗起『F』字頭英文！（粗口？）係Forgive（原諒）同Forgot（忘記）呀！想忘記咗件事，但個腦唔係要Forgot就Forgot到，不過當我Forgive咗佢，我就Delete咗件事，就算見番嗰個人都唔會尷尬。」至於一直光頭是否就要證明「張衞健冇毛都得」？他坦言：「有關事又唔關事啦！嗰時咁啱要剃頭拍清裝，反正我係靠實力……再加少少靚仔。」

張衞健被嘲冇毛冇價值，索性Keep光頭證實力。

慘受「乾煎」之苦

光頭唯一缺點是令Dicky飽受「乾煎」之痛，在佛山拍劇時，於40度高溫下日日暴曬長達三個月，他呻：「我冇毛保護頭皮，直曬落嚟喎！大佬！曬到瘟瘟燉燉，連兩句對白都講唔到，所有Energy都攞晒嚟對抗天氣。」問到今次豈不是攞苦嚟辛？坐擁幾億身家的他卻自嘲「賤命」：「So Far我未試過拍一部好舒服嘅劇會爆，每次畀人話係代表作之中嘅代表作嘅，都係拍得好辛苦，所以喺我嘅概念裏面，天生辛苦命，唔辛苦點得世間財？」他又透露開拍前曾考慮以全新演繹方式去演：「有諗過觀眾想睇邊樣？想睇『張衞健』但又唔畀佢睇好唔好呢？」正當諗到頭髮都冇得甩時，坊間一句「還我大帥哥」令他想通：「令我覺得唔做張衞健嘅話，觀眾又使乜睇我？扮梁朝偉拍大帥哥？咁我睇梁朝偉啦，唔使睇張衞健！」

============================================================