來源: 蘋果日報
【冇咁易畀你估到】大熱倒灶冇失落 張衞健：我對得住觀眾
一年一度嘅台慶頒獎禮所有獎項已經塵埃落定，張衞健（Dicky）演出嘅《大帥哥》大熱倒灶失落視帝，好多人都戥佢唔抵，好似楊秀惠同蔡思貝噚日出席活動，蔡思貝覺得Dicky功不可沒，楊秀惠就話：「Dicky永遠都係我哋心目中嘅視帝！」
張衞健失落視帝！
噚晚Dicky喺將軍澳出席活動，講到《大帥哥》嘅演員戥佢唔抵，佢話：「佢哋見到我嘅付出，感觸大啲啫，我最希望觀眾睇到每個演員嘅進步，當然我咁多年都冇攞過獎，有獎當然開心，不過聽到好多朋友話要趕返屋企睇電視，對我嚟講，營造到呢個氣氛，又可以攞到觀眾嘅心，呢樣先係最開心。」
Dicky話最開心係攞到觀眾個心！
Dicky現身撐蘇永康！
至於點解缺席頒獎禮，Dicky話：「唔使喇！我去嚟做乜呀？正經嚟講只係想做好啲戲，只希望得到觀眾嘅心，人生可以渺小，但唔可以虛度，角色戲份少，但唔可以hea做，呢個係我咁耐以嚟嘅宗旨，總之大帥哥呢個角色，我對得住自己、對得住觀眾，將暫時最好嘅張衞健奉獻咗畀觀眾。」唔知Dicky係咪要拍劇拍到攞獎為止﹖佢哈哈笑話：「你知我鍾意講笑㗎嘛，有時亦會認真，大帥哥又點會咁易畀大家捉摸到。」
蘇永康亦都力撐好友冇失落，佢話：「張衞健只係想拍一部佢鍾意嘅港產劇畀大家睇，o依家目的已經達到，收視亦都證明佢已經做到，其他嘢對佢已經唔重要。」
沒有留言:
發佈留言