來源: 頭條日報
同偶像張衛健合作 譚凱琪日日開工有嘢學
譚凱琪（Zoie）最近在劇集《大帥哥》中飾演日本藝伎「葉天嬌」，做得「大帥哥」張衛健的老婆，當然跟張衛健有好多對手戲。Zoie坦承是張衛健粉絲，最初知跟偶像合作超開心，難得合作後發現對方又勁好人，不但會主動畀意見，仲會示範埋，搞到每日開工似上堂，所以她好想有機會再同對方合作兼學嘢。
話細細個睇張衛健作品大，Zoie絕對唔係講大話，「我細個真係好鍾意睇電視，健哥啲作品當然有睇啦！佢嗰啲金句同埋生鬼演出，真係好精彩，好鍾意睇佢演戲，所以佢都係伴住我成長嘅偶像嚟。」
Zoie最希望張衛健多些回娘家拍劇，她就有機會再偷師。
Zoie最難忘跟張衛健這場感情戲，對方還示範一次給她參考。
「大帥哥」和「天嬌」這對夫妻，都算多經歷。
劇中「葉天嬌」其實真正身份是日本人「舞川奈伊」。
劇組到佛山拍外景，造就Zoie同偶像撐枱腳，不過身邊當然仲有成大班人啦！
Zoie話首次見張衛健，當時自己仲係好怕羞。
好想再合作
Zoie得知今次有機會跟偶像合作，開心到差點瞓唔着，「知同佢有感情線，即係會有好多對手戲，真係好開心，但差唔多開拍就好緊張，好驚佢會好Cool，因為我比較慢熱，點知佢一開工就撩人玩，仲會主動提好多意見我，甚至會示範埋畀我睇，真係好感動！開工似喺度學嘢，好想有機會同佢再合作呀！」
以日本音樂教父小室哲哉徒弟入行的Zoie，當年曾學習日文，但放低了一段日子，今次為了「天嬌」這個角色，又重新再補習，「其實天嬌本身係個日本人嚟，所以開拍前我都有去咗轉日本攞番啲感覺，由於我要講日文對白，所以都有再補課，但因為有好多用字冇講過，都要靠死背，希望出嚟效果好啦！」
沒有留言:
發佈留言