【報紙】Big4後勁不繼 馬時亨趕接棒

日期: 2010年5月26日
來源: 蘋果日報

Big4後勁不繼　馬時亨趕接棒

無綫生活台之前嘅皇牌節目《志雲飯局》暫時停業之後，電視台臨急臨忙搵咗許志安、張衞健、梁漢文（ Edmond）同蘇永康一齊主持《 Big4大四喜》嚟頂替，高層一心諗住以佢哋四個喺圈中人脈應該可以請嚟唔少有份量嘅嘉賓，但係呢個如意算盤打唔響，因為佢哋主要嘅朋友都係歌星，好似陳奕迅、李克勤同譚詠麟等，幾乎全部都係四大唱片嘅人，佢哋因為同無綫版稅問題仲未解決，所以根本唔可以亮相，搞到佢哋四個邀請嘉賓頭都大晒。

馬時亨節目救亡

不過無論如何 Big4都會撐完10集為止，但電視台見咁嘅情況，立即叫馬時亨錄影主持節目以備不時之需，馬時亨日前馬上搵咗同係基督徒嘅鄭秀文錄第一集。

Big4噚日再度出動友情牌請超儀做嘉賓

此外，噚日 Big4去到鴨脷洲錄影新一集嘅《大四喜》，今次嘉賓係何超儀同任賢齊，其中一個話題係「老婆/女友批准出軌一次，珍貴機會送給誰？」安仔一聽到就話：「揀張茜，因為鍾意佢講廣東話唔正。」健仔就還以顏色話：「我就鍾意天后，要瘦硬硬淨淨。」講到咁明顯，係人都知講 Sammi。