【報紙】蘇永康孖兄弟濕平做埋美指

日期: 2010年5月4日
來源: 東方日報

蘇永康孖兄弟濕平做埋美指

正所謂「人生難得有知己」！許志安、張衞健、蘇永康、梁漢文識咗十幾年，佢哋嘅友情分分鐘好過啲親兄弟。早前康仔同安仔、健仔去咗中環「濕平」（shopping），鍾意扮靚嘅佢做埋「美術指導」畀意見。夜晚康仔就變身廿四孝男友，陪女友Anita到銅鑼灣食飯。

安仔（左）同康仔發現鏡頭，即刻主動向記者揮手，態度友善。

四子由華星年代到家吓，一齊經歷唔少高低起跌，就好似多年前梁漢文（Edmond）陷入財政困境，當時好景嘅安仔就義不容辭出錢幫佢贖番架未供完嘅波子跑車。今時今日，呢啲咁重情義嘅兄弟去邊度搵吖？

撇甩Edmond 

不過，八太早前就見到康仔、安仔同健仔去咗中環「濕平」，但就冇Edmond份。當日下午四點幾，康仔、安仔同健仔去咗ifc連卡佛行街，喺男裝部睇衫又睇鞋。對衣着講究嘅康仔全程做安仔軍師畀意見，而健仔就自己睇。

健仔懶理老友一個人揀衫。

右起：健仔、Edmond、康仔同安仔一齊經歷唔少風浪，感情要好。（資料圖片）

盡顯風度 

咪睇安仔眼細，其實不知幾眼利！原本好專心咁揀緊鞋嘅佢，一轉身就畀佢發現咗企喺遠處嘅八太，佢冇黑面不特止，仲叫埋身旁嘅康仔同八太揮手打招呼，鬼咁友善。之後店員帶咗佢哋入VIP房試衫，相信佢哋斬獲都唔少呢！