【雜誌】錢國偉做老襯靠 Big Four

日期: 2014年12月4日
來源: 壹週刊，第1291期

送三卡鑽戒 錢國偉做老襯靠 Big Four

錢國偉今年6月，趁住同Big Four去美國做騷，向女友陳宛蔚求婚，片段首次曝光！錢國偉喺美國求婚成功，以三卡鑽戒加十成十誠意，將味之天使中嘅「雜果賓治」陳宛蔚私有化，兄弟Big Four都可以話係功不可沒！

跟 Big Four好朋友，經常約埋睇 show。

張衞健做指揮

為幫肥 Wil促成好事，張衞健拍片兼做總指揮，要男主角跪地送花送三卡鑽戒，終於搞掂，錢國偉可以老襯娶老婆。

張衞健負責揸機，出晒口術幫拖架！求婚片段中，見錢國偉揸住一束鮮花，一步步走向女友身邊，Big Four跟在場一班工作人員隨即起哄拍掌，之後擔任總指揮的張衞健一聲令下，「喂！唔得架喎，Wilson，要跪架喎！」當陳宛蔚嚇到不知所措嗰陣，張衞健又幫口啦！全程用手機「隊」住準 Wil嫂，笑住問：「佢只不過想問你今晚埋單得唔得啫？」好兄弟幫手搞氣氛，錢國偉都唔再怕醜，剖白心聲。

梁漢文教路

Big Four幫拖， Wilson求婚成功，雖然準錢太淨係狂叫「好驚」，但最後都點頭答應肯嫁。錢國偉隨即攞出三卡婚戒為女友戴上，過來人梁漢文教路：「男左女右呀，戴中指！」準錢太戴上戒指後，全場歡呼， Wilson亦興奮得逐個兄弟攬。許志安同準新郎一樣興奮：「我哋等咗好耐，唔敢講。」蘇永康再加多句：「我哋過嚟做騷都係為咗呢件事（求婚）。」

據知錢國偉諗住出年擺酒正式娶女友過門，有咁多圈中好友，預計四、五十圍一定走唔甩！一對新人仲會去歐洲影婚紗相添呀！