【報紙】張衞健貓晒打橫抬走

日期: 2014年12月4日
來源: 太陽報

張衞健貓晒 的褲頭打橫抬走

蘇永康前晚婚宴後拉大隊出席After Party，眾賓客上演現實版「醉爆伴郎團」，張衞健醉到要新郎哥加五名壯士打橫抬上車，期間被插面及扯褲頭免他走光，認真狼狽！其太太張茜亦面紅耳赤，由司機扶住走。

蘇永康前晚在尖沙咀洲際酒店筵開50席婚宴，賓客星光熠熠，「醉貓」曾志偉及梁漢文早已「醉爆」婚禮上，搞鬼的江欣燕火速將志偉「貓樣」及與舊愛張衞健夫婦世紀合照放上網，吳君如步出婚宴場地時張開手左搖右擺落樓梯。問到是否飲了很多？君如說：「食咗好多嘢！」其後，眾人到銅鑼灣參加After Party，包括陳奕迅夫婦、容祖兒與男友劉浩龍、梁漢文和許志安等，玩至凌晨三時才離開，之前蘇永康在拉斯維加斯影婚紗相取材自電影《醉爆伴郎團》，怎料前晚即上演現實版。

兄弟幫手遮面

飲到行唔到的張衞健（Dicky）在草蜢三子、蘇永康及兩壯男攙扶下步出大門，做開路先鋒的蔡一傑先向記者說：「記者朋友，麻煩幫幫拖，有人飲醉咗，我哋搞掂佢（Dicky）畀你哋影，唔好影到佢。」站在Dicky身旁的太太張茜滿面通紅，拖實司機上車，因Dicky醉到冇晒知覺，眾兄弟不想其「貓樣」被攝入鏡，不斷用手遮他的面，又扯住其褲頭拖住行。

張茜錫完額頭瞓心口

由於Dicky趴住行，未知有否「戚袋袋」，幾經辛苦眾人終將Dicky打橫抬上車。張茜見老公「不省人事」亦一臉無奈，惟有親親老公額頭後再瞓落健仔心口，擾攘足足五分鐘，一眾朋友不禁掩嘴笑！

另一醉漢吳國敬與圈外女友Elaine腳步浮浮離開，更誤上傳媒車，當問到兩人去哪兒時未有任何反應，最後記者載他們去轉的士，認真爆笑！至於新郎哥蘇永康扶完Dicky上車後即拖實老婆及蔡一智兩兄弟上車離開，證婚人陳奕迅夫婦亦手拖手孖住走，並禮貌地與記者講拜拜。