來源: 頭條日報
頭條戲場 ——《星夢動物園》不能只有我睇到
男主角樹熊阿畢為挽救已成雞肋嘅大劇場，決定嚟一個置之死地而後生，就係辦一場動物歌唱比賽，即係類似星夢乜乜或物物巨星，觀眾見證一個巨星嘅誕生，當中正常地遇到大挫折，想放棄或放棄咗然後因為一個人一件事一個念頭而重新振作，合家歡動畫片的一貫套路，但重點係動物們全部勁可愛，參賽嘅同唔關事嘅都過癮到癲，最重要全片由65首1940年到家陣嘅超好聽金曲貫穿，散場好快樂。
一班得意動物各有性格同技能，而我最冧前排中間的青蛙三人組，跳舞好睇又成日鬧交，性格好鬼出。
阿畢自小跟老竇去劇院睇騷，從此踏上不歸路，心願就係搞一個華麗嘅劇院。
電影由《壞蛋獎門人》系列及《迷你兵團》班底創作，其實都唔使多講，另又入圍第74屆金球獎最佳動畫。英語配音版有一大堆一級紅星如Matthew McConaughey、Reese Witherspoon及Scarlett Johansson坐鎮，而粵語配音版就有張衛健搭靚媽梁詠琪。故事模式起碼拍咗一億次，但風格唔同，人同搞鬼動物當然有分別。
擁有一把靚聲嘅美雅好抵得諗，就算入唔到圍做幕後都心滿意足，但父母以為佢有份參賽。
Johnny仔被賊父安排揸賊車，但佢心目中只想做一個歌手，經常感歎好陰功。
入圍者威猛先生同樂詩，因為都是豬豬，所以被阿畢安排一組比賽，前者着緊身衣跳舞勁Sexy。
豬媽樂詩家有一堆豬仔，平日忙湊仔又要照顧老公，但佢心中愛唱歌嘅火從來無熄，去超市買嘢突然技癢。
本來好有Power嘅箭豬阿雪因為失戀而跌Watt，阿畢頭都大埋。
簡單得意又好笑
全片笑位好多，有小笑有大笑有陰陰笑，感動位亦有，最難得主角同配角嘅性格都好出，老鼠Mike自負不可一世、把聲靚到暈嘅象女美雅好怕醜、想脫離黑社會嘅猩猩Johnny仔唱歌好人品亦佳、Rock友箭豬女阿雪好有Power仲非常自強不息，一眾參賽配角們最令我笑完再笑，特別那隊青蛙三人組同表演欲超強嘅黐線日本熊組合，好一套熱鬧又勵志嘅歌舞片。
（12月22日上映）
沒有留言:
發佈留言