【報紙】張衛健: 講緊生仔就講生仔

日期: 2016年12月11日
來源: 蘋果日報

【唔好講其他】蘇永康生仔唔想似「梁游」  張衛健：講緊生仔就講生仔

49歲嘅蘇永康（阿公），之前宣佈「老來得子」，老婆馮翠珊有喜5個月，仲發表咗一番個人見解，表示：「我唔想生個梁天恆（梁頌恆），我唔想生個游蕙禎。」

其後阿公指張衛健叫過佢講少句，今日張衛健喺圓方為配音動畫出席首映。講到阿公嘅「偉論」，張衛健就一臉嚴肅咁話：「唔可以話擔心，我覺得講緊生仔就講生仔，唔好講其他。」

今日張衛健喺圓方為配音動畫出席首映

講到老友蘇永康生仔唔想似「梁游」，張衛健就話唔講其他

阿公之前話擔心Big Four教壞佢個仔，健仔即刻笑笑口講：「每人教佢最強嗰幾瓣，我會教歷史、人體學、追女仔、做戲、做個正直可靠嘅人，嫖賭飲吹就等佢哋教，真係好戥佢開心，老懷安慰，有人擔幡買水，本來我霸咗嚟做，車頭相我攞，o依家唯有幫佢揸車，佢成日撞車。」