來源: Cosmopolitan
《大帥哥》張衞健享齊人福 大帥夫人蔡思貝 楊秀惠 譚凱琪誰最得寵？
無線年底壓軸大劇《大帥哥》準備播出，劇中除咗有風流倜儻嘅大帥張衞健，仲有三個位風情萬種嘅姨太太。雖然不及《小寶與康熙》裡面嘅韋小寶咁多美人圍繞，但一樣艷福不淺。劇集仲會喺內地視頻網站播出，香港同內地觀眾齊齊坐定定睇張衞健點樣周旋喺女人同江湖之間，點樣又搞笑又chok咁講返「涼風有信秋月無邊」出嚟。可以話係今年最值得期待嘅TVB台慶劇呀。
近年每逢大製作劇集收視基本撲直嘅無線不斷出招挽留香港觀眾，常用招數係揾班離巢老臣子拍劇，今時今日終於輪到張衛健回歸。Dicky形象一向風流倜儻，新劇《大帥哥》都用返舊套路，要襯托佢嘅風流當然要有美女，劇中就揾咗蔡思貝，譚凱琪，楊秀惠三個風格各異嘅美女嚟做Dicky劇中角色，民初旅長狄奇嘅姨太太，Dicky享盡齊人之福呀。
Dicky以前個孫悟空夠經典，新角色狄奇能否再創另一個經典？
Dicky返TVB拍劇，陣容上當然唔能夠怠慢，劇組除咗安排洪永城，曹永廉，徐榮，李嘉做狄奇兄弟之外，仲有蔡思貝，譚凱琪，楊秀惠做佢姨太太，艷福不淺。
三位姨太太都各有特色。
譚凱琪
譚凱琪飾演日本藝伎葉天嬌，溫柔體貼，善解人意，雖然佢外表嬌小可愛，小鳥依人，但佢係狄奇大姨太，主持家頭細務，對狄奇忠心耿耿，亦深得狄奇信任。
葉天嬌仲有個日本名叫舞川奈衣，音同冇穿內衣，幾有Gimmick。
楊秀惠
楊秀惠演嘅二姨太艾妞明星出身，身材前凸後翹，婀娜多姿，對狄奇有很強佔有慾，很容易吃大姨太同三姨太醋，希望狄奇多關注自己。楊秀惠非常有女人味，尤其係身材弗到漏，十足十民初女明星。
大姨太二姨太都係愛狄奇愛到要生要死嘅美人都未滿足，劇組仲要安排多個小辣椒俾佢。
蔡思貝
蔡思貝演三姨太章沅婉，隱藏身份嘅革命黨，靠近狄奇想殺佢謀反，點知喺鬥智鬥勇之中愛上目標，沅婉性格似男仔頭，不服輸，同兩個千嬌百媚嘅姨太完全唔同，按照故事發展呢種特別嘅性格當然特別吸引狄奇。
狄奇抱起沅婉一臉滿足，相信三姨太先係佢靈魂伴侶。
究竟觀眾對Dicky同三位姨太太受唔受落呢？
沒有留言:
發佈留言