【網絡】代入大台思維

日期: 2017年2月20日
來源: 葡萄友

代入大台思維  張衛健回巢應該係拍蔡思貝!

張衛健一直喺大陸搲銀多年，搵人仔兼結婚生仔，當年喺香港時幫大台拍落嘅電視劇至今都一直係經典，亦被稱為「大台最後的風光時刻」；因為自佢一走之後，就到林峯、鄭家穎上位，及後發前至目前陳展鵬、王浩信之流。令人慨嘆蜀中無大將，不過張衛健就透露，有好大機會返大台為娘家拍一部劇，回饋香港人咁話喎！對餓咗好耐劇嘅香港人嚟講當然係天大喜訊啦！不過大家諗深一層，又好怕遇到以下情況令成件事變成一場災難！

張衛健拍蔡思貝

眾所周知大台無人可用，宜家用極都係嗰十位八位，而女主角方面又偏愛蔡思貝、陳凱琳，兩位都係接近零觀眾緣。所以張衛健回巢大家都擔心就係大台會塞一個「當打女一花旦」（佢哋覺得係）嘅去做女主角，唯一希望係張衛健有Say可以揀女主角啦，如果唔係，觀眾就會一啖砂糖一啖………

煮個麵你食? 

大台近年劇集唔係抄就係老土，總之就無乜創意，反而張衛健本身係超有創作力嘅演員，加上又出外浸淫多年，返到嚟應該更加對大台嘅劇本有所要求；如果大台仲仍然用普通用開嘅橋段及劇情「我煮個麵你食。」恐怕考起張衛健要點樣化腐朽為神奇喇，好期待佢自己新創作嘅金句呀！

張衛健加入愛回家

呢個亦係網民最怕遇到嘅事件之一，雖知道近《愛・回家》因為自覺「好評如潮」，然後就一而再，再而三咁無限輪迴翻炒，車輪式改個第二個名又拎出嚟播；隨時大台忽然覺得加入張衛健作為招徠，好似上一輯叫毛舜筠加入救亡一樣。但結果係點？咪好地地一個出色演員，變成師奶劇入面可有可無嘅大茄囉！