【報紙】張衞健讚: B仔似老母, 即刻放心晒!

* 編按:
相關影片可以按這裡觀看。

(來源: 影片截圖)

日期: 2017年3月21日
來源: 蘋果日報

【蘇康剪臍帶】B仔個樣似老母！張衞健讚咁咪靚仔：我即刻放心晒嘞

你哋唔知咩？雷頌德今日漏口風，爆好友蘇永康噚日做咗爸爸 (新聞連結：http://bit.ly/2mKtZvj)，蘇永康其後向傳媒報喜，稱母子平安，BB好可愛。

張衞健接受電話訪問表示：「我老婆特登北京返嚟陪佢老婆生仔，因為我噚日要開工，我就派老婆代我去，我半夜三更先收工，返嚟聽到老婆講好感動、好開心，阿康仲自己剪臍帶㖭，直情《妙手仁心》上身啦，見到佢戴住手術帽、着手術衫、揸住把較剪，真係《妙手仁心》上身。」

問到初為人父嘅阿公有冇感動到喊？健仔笑笑口講：「咁又冇喊，我感動到喊，BIG 4終於有後，有人繼承BIG 4嘅衣鉢。」

問到知唔知BB幾重？健仔話：「唔知喎，但睇得出手長腳長，個樣似老母，我即刻放心晒嘞，似阿媽咁咪靚仔，放心囉，睇得出得老竇老母真傳，手長腳長，我哋唔知探得未，留咗言話方便就殺到，因為我哋都忙，我拍緊戲，安仔又忙緊，Edmond去咗日本。」

健仔仲爆料:「老婆話見到佢入產房之前，阿公一舉手一投足依然係架勢，但一生完之後，揸住BB手指即刻溫柔晒，嗰啲阿公款唔見晒，成對眼都溫柔晒，好感動，我好戥康媽抱孫開心。」