【報紙】回TVB獨享「標準工時」兼任改劇本

* 編按:
不是改，是參與啦! 他是創作型演員呀，不然哪裡來那麼多金句啊~

日期: 2017年3月6日
來源: 蘋果日報

【獨家】52歲張衞健回TVB做軍閥 獨享「標準工時」兼任改劇本

無綫中生、小生荒嚴重，面孔嚟嚟去去嗰幾個，召喚舊將幾乎係近年指定動作。

今年52歲嘅張衞健(健仔)，上月中，高調宣佈返大台拍賀歲劇《大帥哥》。喺簽約記招上，健仔獲兩大高層珍姐同樂易玲做左右護法，珍姐仲忍唔住淚灑當場。當日健仔講到明返無綫，純粹係為咗慶祝娘家台慶50周年。而喺今次新劇中，健仔將會飾演大軍閥，老婆分別有蔡思貝、楊秀惠同譚凱琪，個個老婆都同健仔相差20年或以上，好在天生童顏嘅健仔，點睇都唔似50開外。

上個月健仔高調回巢，簽約記招中仲有兩大高層曾勵珍同樂易玲「護航」。

52歲健仔都好襟老。

錢，返得無綫嘅健仔預咗奀，不過佢喺簽約之前，就講到明會有規矩要大台「將就」吓。據知，拍慣大陸劇嘅健仔，以往每日只會拍10個鐘收工，所以佢同無綫講明，返嚟拍劇條件之一，就係每日只可以拍12個鐘。對於無綫爭分奪秒，租廠景、外景場地嘅錢都要計到盡嘅原則，絕對係背道而馳。其次係，健仔有權度橋、隨時改劇本甚至拍檔對白，對於尚算係新丁嘅蔡思貝、譚凱琪嚟講，應該都幾吃力。

《西遊記》絕對係健仔喺大台嘅代表作。

仲有江華同黎耀祥都好正。

張衞健今日以電話回覆《蘋果》，禮貌解釋唔可以披露合約內容，但承認有充裕時間休息，佢話唔介意拖長拍攝期﹕「做人公道啲，人哋畀足夠有凸嘅時間畀你去休息，同畀你去做一啲鏡頭以外嘅時間去創作，你又要休息又要時間短，冇咁嘅事啦，不如攞部iPhone嚟拍。（怕唔怕其他演員投訴？）冇得驚喇，我唔係TVB藝員，但我以前咪一樣係咁，當我有合約時，都係每日瞓兩個鐘，三、四、五個鐘嗰日都好多㗎喇，我都過咗唔知幾多年。」

講到酬勞偏低，健仔話﹕「講就多餘，TVB同你傾就唔好講錢，大家維持朋友關係。」講心唔講金，但健仔仍然會好努力度橋創作新角色，問到會唔會有「Yo！使乜驚呀！」、「我係花果山水簾洞美猴王齊天大聖孫悟空！」、「型到跌渣！ 」等金句？健仔話﹕「今次返嚟一個重要原因，係好耐未試過用廣東話講對白。但我從未試過開工前諗到（金句），每次都係開工後去感受角色，可能沖緊涼、食緊飯，瞓覺前熄燈，突然spark就嚟，好輕鬆就會出嚟，但到o依家都未有頭緒，但一定會度。」

面對健仔，蔡思貝唔知招唔招架到！

屬高妹一族嘅楊秀惠，要做健仔老婆，應該幾有喜感。

譚凱琪

對於拍檔健仔有特權，楊秀惠回覆傳媒話：「唔好意思，其實未同公司開會，所以有好多嘢未清楚，不過自己就好期待同佢（健仔）開工，呢個係一個學嘢嘅好機會。」而蔡思貝就話：「開心！多謝公司俾機會。」佢仲話唔介意健仔話唔識佢o添！