【報紙】張衞健認有足夠時間休息

日期: 2017年3月7日
來源: 都市日報

享特權? 張衞健認有足夠時間休息

事隔20年回巢無綫拍劇的張衞健，揚言為娘家「講心唔講金」的他，昨日被傳獲無綫賜予「特權」，每日「標準工時」只做12個鐘，更可隨時改劇本同演員對白㖭！所以話：「Yo！拍劇，使乜驚！」

張衞健話今次幫娘家拍劇「講心唔講金」，但就有傳獲無綫賜予「特權」等佢拍得舒舒服服。

傳張衞健有權改劇本同對白，作為後輩的蔡思貝未知應唔應付到呢？至於有份參演的楊秀惠則謂期待與對方拍攝，更視此次合作為學習機會。

張衞健宣布回巢拍50周年台慶劇《大帥哥》，記者會當日獲兩大高層曾勵珍（右二）及樂易玲（左）撐場。

張衞健（Dicky）於上月宣布回巢拍攝50周年無綫台慶劇《大帥哥》，劇中更獲安排一眾靚女小花蔡思貝、楊秀惠及譚凱琪做老婆，可謂艷福無邊！相隔20年再跟無綫合作，雖然Dicky聲稱今次不計酬勞，但無綫方面亦好識做，有傳劇本、拍攝時間等一切就晒對方，認真畀足面！昨日有報道指Dicky與無綫簽約前，講明拍劇條件，每天只可開工12小時；而他必須有權度橋、改劇本或演員對白，換言之，一班後輩蔡思貝和楊秀惠等隨時要挑戰「飛紙仔」！
對此Dicky接受傳媒訪問時，表示不可披露合約內容，但坦認今次拍劇有充足時間休息，又自言不介意拖長拍攝期：「人哋畀足夠有凸嘅時間你去休息，又畀你喺鏡頭以外嘅時間去創作，你又要休息又要時間短，冇咁嘅事啦，不如攞部iPhone嚟拍。」他直言無懼遭其他演員投訴，更謂昔日仍是無綫合約藝員時，多年來也每日瞓得兩個鐘。提到酬勞偏低，Dicky表示跟無綫「講心唔講金」，會依舊盡力度橋創作新角色。