【報紙】羅嘉良 VS 張衛健

* 編按:
別只說厚此薄彼，也要自己有實力和肯爭取，別人又同意和認同才能有結果呀。

日期: 2017年3月10日
來源: am730

《魚油一樽》方俊傑: 羅嘉良 VS 張衛健

已經很多年沒有完整地追看一齣本地電視劇。開手機app重溫好方便，都唔煲一煲《親親我好媽》？Sorry囉，要追《The Walking Dead》嘛，Netflix又不斷出新劇，還想開松隆子套《四重奏》。若非方太部電視由朝開到晚，我真係未必知道羅嘉良已經回巢。

好友金星妹對煲劇的興趣更薄弱，一集《Game of Thrones》也沒看過。「我知自己好容易沉迷一件事。如果，開了一套劇，我會不眠不食不休，瘋狂地投入，影響日常生活。情願與劇隔絕。」噢，損失了很大樂趣。你跟她說《與諜同謀》，她當然毫無頭緒。

還好，地球上有茶記。金星妹有個古怪喜好，吃晚飯專挑難食的餐廳，貪客人不多，可以慢慢坐而不會受到澳牛式對待。這一晚，在尖沙咀，我們又去了一間人流極少的茶記晚飯，坐在對住電視機的卡位，畫面左邊是鄭俊弘，右邊是羅嘉良，各佔一半。

「唔係啩，鄭俊弘同羅嘉良平起平坐？」金星妹很驚訝。「羅嘉良，你又識？」一個不看電視劇的人，原則上，無理由會對羅嘉良留下深刻印象。「你都癡線嘅，佢最紅嗰時啲劇，我有睇㗎。」《難兄難弟》，1997年，金星妹七歲，又確係睇電視劇的黃金歲月。「聽講，鄭俊弘的戲份更加多喎，電視台想借羅嘉良來捧自己友鄭俊弘嘛，好合理吖。」「合理？羅嘉良喎，三屆視帝喎，隔成八年先返香港拍劇喎。咁大件事，應該打鑼打鼓大事鋪張啦，而家你叫佢做陪襯？」「嘩，你的記性咁好嘅？」「我剛剛上完維基百科。」金星妹果然是個求知慾強的九十後。

經金星妹提一提，又好像有點奇怪。同為九十年代當紅小生，羅嘉良的地位不會低過張衛健，但張衛健重返大台，講明有操控製作的特權之外，高層仲要在記招灑淚感恩，再預先宣布擔正作品會成為重頭台慶劇，厚此薄彼情況，實在相當明顯。

「做人呀，都係高調的好。有資格去要求時，應該盡量要求。不講架子，做好人，謙虛，最後都只會令自己蝕底。」望著金星妹，我嘗試如此總結。然後，一看便知難吃的肉骨扒送來了。一路吞，一路看羅嘉良，扮演李佳芯的老闆，衣著品味帶點侯志強feel。「羅嘉良真是一個專業的好演員，你看他的一臉倦容，完全沒有掩飾，非常寫實。一般來說，電視劇入面的男主角，無論幾大年紀或者從事甚麼職位或者在甚麼時候，都必定有型有款。大佬呀，現實生活入面，人會老人會殘人會攰，點會個個似三哥咁樣呀？好似好眼瞓的羅嘉良先算活用方法演技呀！喺香港生活，打工仔好，大老闆又好，點會唔眼瞓先得㗎！」黃心穎做羅嘉良個女，不是條女，這套劇，是終於有幾分寫實。