【報紙】同許冠文撞Look撞到嘭嘭聲

日期: 2017年3月10日
來源: 東方日報

張衞健同許冠文撞Look撞到嘭嘭聲

相隔20年，張衞健（Dicky)重返無綫演五十周年台慶劇《大帥哥》，今日《大》劇試造型，焦點當然落喺Dicky身上，嘩！Dicky呢個「大帥哥」Look似邊個經典造型？畀3秒大家估，1...2...3...開估，咪就係1972年嘅電影《大軍閥》許冠文所飾嘅龐大虎造型囉。

今次真係若要人似我，除非兩個我喇～

Dicky好有氣勢！

光頭同二撇雞係招牌～

無論係個招牌光頭、二撇雞（鬍子）、同埋嗰套軍服，Dicky同當年嘅許冠文簡直就似孖生兄弟一樣，原來許冠文當年拍《大軍閥》係佢電影處男作，仲要犧牲剃頭𠻹，Dicky今次呢個「大帥哥」Look，唔知會唔會再創經典呢？

唔知Dicky今次喺新劇內會爆啲咩金句呢？

Dicky讚蔡思貝得意！Dicky仲話希望孖住演齡較Fresh嘅蔡思貝同洪永城（右）有新火花。

為新劇狂推Job嗌肉痛

對於離開「母校」無綫逾二十年後回巢拍《大帥哥》，Dicky指角色由希望刮盡財寶的土王帝，後期發展到希望將所屬地方變成一片樂土。問到Dicky可滿意劇本？他說：「不如咁講，未見過一個劇本一開始係完美，要一路拍一路調整，不過都滿意嘅。（有冇畀意見修改？）佢哋都希望我有啲嘢加入去，但未試過未拍就諗定晒啲金句，一路拍一路再度，希望到時靈感嘭嘭聲。原本抱住玩嘅心態，但經過第一次記者會之後，冇預期外間反應咁大，依家有啲壓力，都要調適番玩嘅心態，太認真反而唔好。同埋依家開始有啲肉赤，公司話推咗好多job，我話再有推job都唔好同我講，數字唔好講喇，自己都鍾意專心拍戲，拍戲嘅時候唔做其他嘢。」

勁型仔。

大合照。

Dicky難忘當年同阿Sa合作嘅《齊天大聖孫悟空》。

曾勵珍（右二）今日都有出席活動。

孖蔡思貝洪永城合作感Fresh

談到Dicky今次的拍檔蔡思貝與洪永城相對比較幼嫩，他說：「蔡思貝今日係第二次見，幾得意、幾可愛！任何人都有一個開始，fresh嘅演員有可以比到啲fresh嘅反應，可能有啲驚喜嘅節奏，可以有啲不一樣嘅效果。自己都鍾意同新演員合作，好似以前同阿Sa（指蔡卓妍）合作都好開心，你都唔知佢會畀到咩反應，做戲冇對與錯。（洪永城叫你死猴子？）咁我一日做猴子，一世都係猴子，戲裏面有好多男人戲，第一日同呢班兄弟接觸感覺唔錯。」