【報紙】健仔出招婆婆冧到跌低

日期: 2002年11月18日
來源: 蘋果日報

健仔出招婆婆冧到跌低

張衛健（健仔）前晚同女友張茜、蘇永康等去灣仔君悅酒店飲完野，噚日就出席沙田「敬老護老愛心券」開售禮，有人問佢張茜留係香港係咪住佢屋企，點知健仔好坦白咁話：「梗係啦，咁既時勢重租酒店咩，慳得就慳啦。」

張衛健（中）昨日在沙田出席敬老活動。

亂咁賠錢

健仔噚日同班婆婆跳健康舞，班婆婆好鬼熱情，重攬住佢錫。之後，健仔去黃大仙為《齊天大聖孫悟空》宣傳，由於要等埋由馬來西亞返黎既 Twins，活動遲二十分鐘先開始，令到現場噓聲四起。不過，當健仔佢派《齊》劇毛公仔時，現場反應又好鬼熱烈，混亂中重有個婆婆跌親，好彩冇乜大礙。健仔真巴閉，連婆婆都俾佢搞到神魂顛倒。

健仔在台下派發《齊》劇毛公仔。

另外，健仔又話，前晚佢去完商台做訪問之後坐保母車走，點知隔籬部車撞埋佢部保母車度，架車個司機一見到健仔，即刻拍一拍佢膊頭，然後又猛讚健仔。搞到健仔鬆毛鬆翼，唔理對方對定錯都照賠錢。